Búgin Parlament Májilisiniń jalpy otyrysynda jer qatynastary máselelerine qatysty zań jobasy I oqylymda maquldandy, dep habarlaıdy Egemen.kz Májilistiń baspasóz qyzmetine silteme jasap.
Zań jobasy Prezıdent Qasym-Jomart Toqaevtyń zań shyǵarý bastamasy tártibimen daıyndaldy. Jalpy zań jobasynda sheteldikterge aýyl sharýashylyǵy maqsatyndaǵy jerlerdi jeke menshik jáne ýaqytsha jer paıdalaný quqyǵymen ıelik etýine tyıym salý kózdelgen.
«Búgingi maquldanyp otyrǵan jer qatynastary týraly zań jobasynyń Qazaqstan qoǵamynda mańyzy da, orny da erekshe. Sebebi Memleket basshysy Qasym-Jomart Kemeluly Toqaevtyń tapsyrmasymen ázirlengen osy qujattyń nátıjesinde halqymyzdyń nazarynda júrgen suraq boıynsha naqty sheshim qabyldandy. Endi jerimizdi sheteldikterge satýǵa da, jalǵa berýge de tolyqtaı tyıym salynady», dedi Nurlan Nyǵmatýlın.
Sonymen qatar Nurlan Nyǵmatýlın bul zań jobasy jer týraly túrli pikirlerdi toqtatyp, aldaǵy ýaqytta jerdi qoldaný múmkindikterin tıimdi paıdalanýǵa jol ashatynyna nazar aýdardy.
Aıta ketý kerek, jer zańnamasynan sheteldik jer paıdalanýshylarǵa jáne sheteldik qatysý úlesi bar birlesken kásiporyndarǵa, sondaı-aq qandastarǵa aýyl sharýashylyǵy jerlerine quqyqtar berý máselelerin reglamentteıtin quqyqtyń materıaldyq normalary alyp tastalmaq.
Bul rette, 2016 jylǵy 1 shildege deıin joǵaryda atalǵan jer paıdalanýshylarǵa jalǵa berý shartymen berilgen aýyl sharýashylyǵy maqsatyndaǵy jer ýchaskelerine ýaqytsha jer paıdalaný quqyǵy jalǵa alý shartynyń qoldanylý merzimi aıaqtalǵanǵa deıin qoldanylatyny jáne uzartylýǵa jatpaıtyny kózdelgen.