Medısınalyq saqtandyrý qorynyń Nur-Sultan qalasy boıynsha qyzmet jetkizýshileriniń biri - №2 kópbeıindi qalalyq aýrýhananyń hırýrgııalyq ınfeksııalar jáne koloproktologııa bólimshesiniń hırýrgteri erekshe ota (Kenııa-Maılstyń biregeı otasyn, tik ishektiń ish-perınaldy ekstırpasııasyn) jasap, naýqastyń ómirin saqtap qaldy, dep habarlaıdy Egemen.kz «Áleýmettik medısınalyq saqtandyrý qory» KeAQ Nur-Sultan qalasy boıynsha fılıalynyń baspasóz qyzmetine silteme jasap.
Pasıent B. 10 kún boıy ózin nashar sezinip, úıde bolǵan. Aýyr jaǵdaıda, ishekten qan ketip, qan qysymy 70/40 mm rt st. shuǵyl túrde jedel járdem brıgadasymen №2 kópbeıindi qalalyq aýrýhanaǵa jetkizilgen.
Qabyldaý kezinde kolonoskopııa júrgizilip, naýqasta tik ishektiń sırkýlıarlyq qaterli isigi anyqtaldy. Pasıenttiń aýyr jaǵdaıyna, tasymaldaý kezinde ólip ketý qaýpine baılanysty ony onkologııalyq ortalyqqa aýystyrý múmkin bolmady.
Osyǵan baılanysty Nur-Sultan qalasynyń shtattan tys hırýrgi Batyr Aıtmoldauly Aıtmoldınnyń basshylyǵymen shuǵyl túrde konsılıým ótkizildi. Onyń barysynda № 2 kópbeıindi qalalyq aýrýhana bazasynda pasıentke ota jasaý týraly sheshim qabyldandy.
Dırektordyń hırýrgııalyq kómek jónindegi orynbasary Batyr Aıtmoldauly Aıtmoldın men hırýrgııalyq ınfeksııalar jáne koloproktologııa bólimshesiniń meńgerýshisi Jomart Ǵalymuly Jalǵasbaev bastaǵan hırırhııalyq brıgada 3 saǵat boıy osy kúrdeli otany jasap, naýqastyń ómirin saqtap qaldy. Qazirgi ýaqytta pasıent B. ózin jaqsy sezinedi.