Qurlyqtyq hokkeı lıgasynda (QHL) óner kórsetetin elordanyń «Barysy» ádette turaqty birinshiliktiń maýsymaralyq úzilisinde kelisimsharty óz máresine jetken úsh-tórt hokkeıshimen qoshtasyp, olardyń ornyn jańa oıynshylarmen tolyqtyratyn. Bul jylda qaıtalanatyn úrdis bolǵandyqtan, hokkeı jankúıerleri úshin úırenshikti jaǵdaı edi.
Alaıda QHL-diń aldaǵy maýsymynda «Barystyń» osy jylǵy quramy túgelimen ózgerýdiń sál-aq aldynda tur. О́ıtkeni osy aıdyń sońynda, naqtylap aıtar bolsaq, 30 sáýirde qazaqstandyq komanda sapynda oınaıtyn 23 hokkeıshi men klýb tizginin byltyr ǵana ustaǵan bas bapker Iýrıı Mıhaılıstiń kelisimsharty aıaqtalady. Ázirge klýb basshylyǵy eshbir oıynshymen kelisimshartyn uzartýǵa asyǵar emes.
1 mamyrdan bastap kelisimsharty aıaqtalǵan «Barystyń» myna hokkeıshileri klýbtan ketýi múmkin. Olar: qaqpashylar – Henrık Karlsson, Ionı Ortıo, Sergeı Kýdrıavsev. Qorǵaýshylar – Djessı Bleker, Samat Danııar, Aleks Lıntýnıemı, Alekseı Maklıýkov, Valerıı Orehov, Dıllon Heterıngton, Vıktor Svedberg. Shabýylshylar – Pavel Akolzın, Fıl Varone, Lınýs Vıdell, Kıortıs Volk, Dmıtrıı Gýrkov, Iаkob Lılıa, Maksım Mýsorov, Kırıll Panıýkov, Zahar Parhomenko, Egor Petýhov, Mettıý Frettın, Dmıtrıı Shevchenko jáne Álıhan Ásetov.
Jalpy «Barys» klýbynda óner kórsetetin hokkeıshilerdiń deni Qazaqstan ulttyq quramasynda oınaıtyny barshaǵa belgili. Sondyqtan kelisimsharty aıaqtalǵan qazaqstandyq oıynshylardyń klýbta qalý-qalmaýy úlken másele bolady dep oılaımyz. Onyń ústine, Samat Danııar, Maksım Mýsorov sııaqty birqatar oıynshy komandanyń tárbıelenýshisi sanalǵandyqtan, klýb basshylyǵy olardy ózge komandalarǵa jibere qoımas. Al komandanyń jarty bıýdjetine ıelik etetin legıonerlerdiń ketý-ketpeýi klýbtyń qarjylyq jaǵdaıyna baılanysty. Buǵan qosa byltyr Prezıdent Qasym-Jomart Toqaev kásipqoı sport klýbtarynyń bıýdjetin eki esege qysqartýǵa tapsyrma bergen bolatyn.
Qazirdiń ózinde komandada úsh jyldan beri oınap kele jatqan Kanadada týyp-ósip, búginde Qazaqstan azamattyǵyn alǵan qorǵaýshy Djessı Bleker men ortalyq shabýylshy Kıortıs Volkke QHL komandalarynyń biri qyzyǵýshylyq tanytyp otyrǵanyn qazaqstandyq jáne reseılik BAQ ókilderi jazyp jatyr. Degenmen hokkeı mamandary bul eki hokkeıshiniń agentteri jasap otyrǵan quıtyrqy áreket dep esepteıdi. О́ıtkeni ujymǵa kóp kómegi tıetin eki oıynshynyń «Baryspen» kelisimsharty aıaqtalatyndyqtan jańa kelisim boıynsha olar aılyq jalaqylaryn kóbeıtip alýdy maqsat etetindikterin aıtady.
О́tken maýsymda 50 oıyn ótkizgen Bleker tórt shaıba soǵyp, áriptesteriniń jeti golyna assıstenttik jasaǵan. Al jalpy úsh maýsymda 40-tan asa upaı jınaǵan ol osy maýsymda sońǵy úsh mańyzdy oıynnyń sheshýshi golyn soǵyp, komandasyna jeńis syılaǵan. Volk ta dál solaı. 62 oıynda muzaıdynǵa shyqqan shabýylshy 10 shaıba soǵyp, áriptesterine 21 márte nátıjeli pas shyǵarǵan.
Bleker men Volktan bólek, taǵy qandaı legıonerlerdiń kelesi maýsymda «Barysqa» kómegi tııýi múmkin? Bul suraqtyń jaýabyn bilý úshin oıynshylardyń byltyrǵy maýsymdaǵy statıstıkalyq derekterine kóz júgirtseńiz jetkilikti. Máselen, shabýylshy Lınýs Vıdell 65 oıynda qarsylastardyń qaqpasyn 10 márte kózdese, 31 ret dál pas asyrǵan. Al taǵy bir shabýylshy Iаkob Lılıa búkil maýsym boıy 36 (21+15) upaı jınaǵan. «Barysqa» qaıta oralǵan kanadalyq Mettıý Frettınniń enshisinde 30 (12+18), Fılıp Varonede 27 (10+17) upaı bar. Mine, bul – legıoner shabýylshylardyń ótken maýsymdaǵy nátıjeleri.
Al oıyny jankúıerlerdiń de, bapkerler quramynyń da kóńilinen shyqpaǵan qorǵaýshylar, atap aıtqanda, jaraqatyna baılanysty 28 oıynǵa ǵana qatysqan Vıktor Svedberg (3+5, 8 upaı) jáne maýsym ortasynda elordalyq klýbtyń qataryna qosylǵan Dıllon Heterıngton (2+5, 7 upaı) men Aleks Lıntýnıemı (0+4) klýbtan ketýi múmkin.
Bas bapker Iýrıı Mıhaılıstiń klýbta qalý-qalmaý máselesi aldaǵy mamyr aıynda Latvııanyń bas shahary – Rıgada ótetin álem chempıonatyndaǵy Qazaqstan ulttyq quramasynyń nátıjesine baılanysty bolmaq. Eger shákirtteri joǵary topta qalyp jatsa, Mıhaılıs «Barystaǵy» jumysyn odan ári jalǵastyra berýi ǵajap emes. Al tómengi topqa túsip qalsa, klýbta qalmaıtyny anyq.