«Azamattarǵa arnalǵan úkimet» memlekettik korporasııasynyń elordalyq fılıalynyń qyzmetkerleri Spýtnık V ekpesin ala bastady.
«Memlekettik korporasııa memlekettik qyzmetterdi «bir tereze» qaǵıdaty boıynsha kórsetýdi qamtamasyz etetin biryńǵaı provaıder. Bizdiń qyzmetkerler árdaıym táýekel aımaǵynda. О́ıtkeni ár maman kún saıyn myńdaǵan qyzmet alýshylarmen baılanysta bolady. Al ekpe ózińizdi jáne basqalardy qorǵaýǵa múmkindik beredi. Alǵashqy bolyp vırýsqa qarsy ekpeni mamandandyrylǵan HQO qyzmetkerleri aldy», dedi fılıal dırektory Mádı Sadanov.
«Azamattarǵa arnalǵan úkimet» MK» KeAQ Nur-Sultan qalasy boıynsha fılıalynyń menedjeri Aınýr Jaqanovanyń aıtýynsha, vaksınany alýǵa tek HQO qyzmetkerleri ǵana emes, sonymen qatar jer kadastry, zeınetaqy jáne áleýmettik qamsyzdandyrý, tirkeý basqarmalarynyń bek-keńseleri men fılıaldyń ákimshilik-basqarý quramy nıet bildirdi. Dırektor bastaǵan basshylyq quramy da shette qalmady.
HQKO qyzmetkerlerin vaksınalaý úshin qoǵamdyq densaýlyq saqtaý basqarmasynyń kóshpeli brıgada jumysy uıymdastyryldy.