Naryq suranystaryn ıgerý jáne ónimniń sapasyn jaqsartý maqsatynda USAID Aýǵanstan men Ortalyq Azııadaǵy qolónershi kásipker áıelderge arnalǵan «Qolóner salasyndaǵy áıelder: baılanys jáne sıfrly saýda» vebınaryn ótkizdi.
Aýǵanstan, Qazaqstan, Qyrǵyzstan, Tájikstan, Túrikmenstan men О́zbekstan isker áıelder qaýymdastyqtarynyń, úkimettik emes uıymdardyń, elektrondy kommersııalyq alańdar jáne saýda-ónerkásip palatasynyń júzden astam ókili qatysqan vebınarda básekege qabilettilikti arttyrý, saýda isin jolǵa qoıý men jumyspen qamtamasyz etý máseleleri kóterildi.
Ulttyq kıim, kilem toqý jáne qoldan jasalǵan buıymdar óndirisindegi mádenı muralardy zamanaýı marketıngtik bilimmen, elektrondy saýda múmkindikterimen jáne onlaın-satý platformalarymen biriktiretin trenıng barysynda bıznes naryǵynda tájirıbesi bar amerıkalyq qolónershiler de óz tájirıbelerimen bólisti.
Sońǵy jıyrma bes jyl ishinde Qazaqstan qolónershiler odaǵynyń elimizdiń túkpir-túkpirindegi segiz júzdeı múshesi dástúrli tehnıkalardy paıdalaný arqyly ulttyq buıymdardyń naqyshyn keltirip júr. Atalǵan odaqtyń tóraǵasy Aıjan Bekqulovanyń aıtýynsha, jańa bolmysqa beıimdelý úshin qolónershi áıelderdiń yqpaldastyǵy asa qajet. Mysaly, Almatyda pandemııaǵa baılanysty jumysy baıaýlap qalǵan qolónershiler jergilikti tutynýshylar úshin betperdeler jáne basqa qorǵanys zattaryn tige bastaǵan. Endi olar sıfrly platformalardy paıdalaný arqyly óz óńirlerinen tys naryqqa shyǵar jol izdestirýde.
USAID aldaǵy ýaqytta Ortalyq Azııa men Aýǵanstanda qoldan jasalǵan erekshe buıymdar týraly aqparatty keńeıtý úshin elektrondy katalog ázirleıtin bolady. Uıymdastyrýshylardyń pikirinshe, bul jańa bıznes modelder men elektrondy platformalar arqyly naryqqa qoljetimdilikke yqpal etip, dástúrdi saqtaýǵa, ónimniń sapasyn jaqsartýǵa jáne ınnovasııalyq tehnologııalar arqyly qorshaǵan ortaǵa zııan keltirý áserin azaıtýǵa múmkindik berýmen qatar, aımaqtaǵy qolónershi áıelderdiń uzaq merzimdi ekonomıkalyq turaqtylyǵyna yqpal etetin bolady.