Reseı Mádenıet mınıstrliginiń habarlaýynsha, byltyr kórshi elde mýzeıge jıyrma mıllıonǵa jýyq adam barypty. Jyl boıyna 2,7 myń kórme jobasy ótken. Budan bólek pandemııalyq ahýalǵa baılanysty onlaın formatta uıymdastyrylǵan 23 myń is-shara 300 mıllıon qaralym jınaǵan.
Al elimizde Ulttyq statıstıka bıýrosynyń málimetinshe, 2020 jyly murajaıǵa kelýshilerdiń sany 2 mıllıon 351 myńdy quraǵan. Onyń 37,3 paıyzy (877,2 myń) – balalar. Byltyr jalpy sany 253 mýzeıde (ol 2019 jylmen salystyrǵanda 3 birlikke ósken) 62 762 ekskýrsııa ótkizilip, tyńdaýshylarǵa 6 972 dáris oqylǵan.
Sonymen qatar qoryq-murajaılarda 1394 tarıh jáne mádenıet eskertkishteri bar. Negizgi qordaǵy eksponattardyń jalpy sany 2580,3 myńdy qurasa, onyń 12,2 paıyzy eksponattalǵan. Sondaı-aq negizgi qorda elektrondy formatta 1001,1 myń jádiger bar. Respýblıkalyq mýzeılerde barlyǵy 4058 kórme uıymdastyrylsa, onyń jeteýi shetelde ótkizilgen.