Saraıshyqtyń tanymaldyǵyn arttyrý úshin zamanaýı týrızm ınfraqurylymy qajet. Bul týraly Prezıdent Atyraý oblysynyń áleýmettik-ekonomıkalyq damý máseleleri jóninde ótken keńeste aıtty, dep habarlaıdy Egemen.kz.
«Atyraý óńirinde qasterli ári tarıhı oryndar kóp. Sonyń biri – ejelgi Saraıshyq qalasy boı kótergen jer. Altyn Orda zamanynda mańyzdy ról atqarǵan shahardyń Qazaqstan aýmaǵynda ornalasýy tegin emes. Bul tól tarıhymyzdyń tamyry tereń ekenin kórsetedi. Bizdiń babalarymyz qala salyp, jańa mádenıetke jol ashqan. Áıgili Saraıshyq – sonyń aıqyn dáleli», dedi Prezıdent.
Osy oraıda Memleket basshysy munda Altyn Orda dáýiriniń handary jáne qazaqtyń uly hany Qasym han jerlengenin atap ótti.
«Jalpy, ulan-baıtaq jerimizdegi kóne shaharlardy, memlekettigimizdiń tarıhynda aıryqsha orny bar Altyn Ordany jan-jaqty zerttep, ǵylymı aqparattyq jumystardy júıeli júrgizý kerek. Sol arqyly eldik shejiremizdi keńinen tanyta alamyz. Osyny jas urpaqtyń sanasyna sińirýimiz kerek. Saraıshyqtyń mańyzdylyǵy men tanymaldyǵyn arttyrý úshin zamanaýı týrızm ınfraqurylymy qajet. Ákimdik Úkimetten vızıt-ortalyq qurylysyna qarajat suraǵan eken. Biraq kelisimin áli almaǵan. Úkimetke osy máseleni dereý sheshýdi tapsyramyn», dedi Q. Toqaev.