Endi elordamyzdyń kórkin ashyp turǵan «Qalamgerler alleıasynan» ótip bara jatsańyz, aldyńyzdan «alaqaılap» aqyn-jazýshylardyń aǵashy shyǵady. Árqaısysynyń óz esimi bar. Súıikti avtoryńyzdy sol mańnan izdep tabasyz. О́z qolymen otyrǵyzǵan kóshettiń aldyndaǵy taqtaıshaǵa aty-jóni jazylǵan.
«Atańnan mal qalǵansha, tal qalsyn» dep túsingen dana halqymyz kóregendiktiń kórkem úlgisin kórsetse kerek. Ony o bastan túısingen astanalyq qalamgerler birden osyndaı ıgi iske óz úlesin qosýǵa nıettenip, kóterińki kóńil kúımen jınaldy.
Qalamǵa sert etken jandar qatar-qatar saıabaqtyń Abaı kóshesine qaraǵan jaǵynda 25 túp aǵash otyrǵyzdy. Kári-jasyna qaramaı bári de bir-bir kúrek ustap, jas kóshettiń jaıqalyp ósýine tilekterin bildirdi. Jazýshylarmen birge Nur-Sultan qalasy ákiminiń orynbasary Baqtııar Máken men Baıqońyr aýdanynyń ákimi Nurbol Nursaǵatov ta bilek túrip, jumysqa kiristi.
«Qoıshyǵara Salǵarauly aǵamyzdyń «Bul senbilikke aldymen ózderińdi kórýge keldim. Pandemııa jaǵdaıynda kóp júrip-tura almaǵandyqtan, osyndaı el-jurt qatysatyn jumysqa kelgenimiz bir jaǵynan qalanyń tazalyǵyna, ekologııasyna qosqan paıdaly úlesimiz bolsa, ekinshi jaǵynan júzdesýimizge de sep bolǵany jaqsy ǵoı», degen sózinde jan bar dep oılaımyn. Búgin «Qalamgerler alleıasynda» otyrǵyzǵan aǵashtar erteńgi bolashaqtyń aǵalarǵa degen qurmetin arttyrýǵa sep bolatyny sózsiz», dedi Qazaqstan Jazýshylar odaǵy Nur-Sultan qalalyq fılıalynyń dırektory Dáýletkereı Kápuly.
Atalǵan sharaǵa qazaq ádebıetiniń kórnekti ókilderi Sultan Orazalın, Qoıshyǵara Salǵarauly, Álibek Asqarov, Nesipbek Aıtuly, Tolymbek Ádiraıym, Sádibek Túgel jáne basqa da belgili aqyn-jazýshylar qatysty. Múshelikke ótken jas býyn da aǵalarymen birlesip, saıabaqtyń sánin keltirdi.
Baıqońyr aýdanynyń ákimdigi uıymdastyrǵan ystyq shaı men baýyrsaq ta qalamger qaýymnyń kóńilin kóterip, jumystan keıin emen-jarqyn dıdarlasýǵa dáneker boldy.