25 sáýirge qaraǵan túni Baǵdadtaǵy Ibn ál-Hatıb aýrýhanasynda órt boldy, dep habarlaıdy Egemen.kz «Anadoly» agenttigine silteme jasap.
Baǵdadtaǵy koronavırýs juqtyrǵan naýqastarǵa arnalǵan aýrýhanadaǵy órtten zardap shekkenderdiń sany 82-ge deıin jetti. Bul týraly Irak telearnasynyń efırinde Irak ishki ister mınıstrliginiń resmı ókili Halıd al-Mıhanna habarlady.
«Koronavırýstyń jańa túrimen (COVID-19) emdelip jatqan Ibn ál-Hatıb aýrýhanasynda bolǵan órttiń saldarynan 82 adam qaıtys boldy, taǵy 110 adam jaraqat aldy», dedi Halıd al-Mıhanna.
Dese de Ishki ister mınıstrliginiń ókili órttiń sebepterin ataǵan joq. Boljam boıynsha órt ottegi ballonynyń jarylýynan shyqqan bolýy múmkin.
Kýágerlerdiń aıtýynsha, ǵımarattyń ishinde dúrbeleń bastalyp, adamdar terezeden sekirgen. 200-den astam naýqas qutqaryldy.
Eki qabatty aýrýhananyń ishi tolyǵymen janyp ketti. Al qaza tapqan naýqastardyń kópshiligi kómirtegi totyǵymen ýlanǵan.
Atalǵan jaǵdaıǵa baılanysty Irak premer-mınıstri muqııat tergeý júrgizýdi tapsyrdy. Sonymen qatar ol eldiń densaýlyq saqtaý mınıstri men Baǵdad merin qyzmetinen shettetti degen habar bar.
Halyq qurbandardy úsh kún aza tutady.