Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 2021 jylǵy 29 sáýirde ótetin Senat otyrysynyń kún tártibin talqylady, dep habarlaıdy Egemen.kz Senattyń baspasóz qyzmetine silteme jasap.
Palatanyń aldaǵy otyrysynda senatorlar «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» zań jobasyn qaraıdy. Prezıdentimiz Qasym-Jomart Toqaev zań shyǵarýǵa bastamashy bolý quqyǵyn paıdalanyp, atalǵan qujatty Parlamentke joldaǵan edi. Bul zań jobasynda aýyl sharýashylyǵy maqsatyndaǵy jerlerdi sheteldikterge satýǵa jáne jalǵa berýge tyıym salý tetikteri qarastyrylǵan.
Sonymen qatar «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda banktik, mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» zań jobasy da Palata otyrysynyń kún tártibine shyǵaryldy. Teris pıǵyldy kollektorlardyń áreketteri qoǵamda aıtarlyqtaı daý týdyrǵany belgili. Soǵan baılanysty Memleket basshysy mıkroqarjylyq jáne kollektorlyq qyzmetti iske asyrýdyń quqyqtyq bazasyn jetildirýdi tapsyrǵan edi. Sondyqtan atalǵan zań jobasynda kollektorlarǵa basqa adamdardyń telefon nómirlerinen qońyraý shalýǵa tyıym salý normasy qarastyrylǵan. Sondaı-aq, olar boryshkerlermen aradaǵy kez kelgen is-áreket kezinde vıdeo jáne aýdıofıksasııa júrgizýge mindetti bolady.
Odan bólek, Bıýro otyrysy kezinde Májilisten kelip túsken zań jobalary Senattyń turaqty Komıtetterine bólinip berildi.