Qyzylorda qalasynda kúrish egý naýqany bastaldy, dep habarlaıdy Egemen.kz.
Búgin qalaǵa qarasty Qaraýyltóbe aýyldyq okrýginde Y.Jaqaev atyndaǵy Qazaq ǵylymı zertteý-ınstıtýty JShS egis alqabynda kúrish dáni sebilip, dıqandar qyzý tirlikke kiristi.
Sharaǵa aýyl aqsaqaldary men qala ákiminiń orynbasary Asqarbek Esjanov qatysyp, sharýalardy egin naýqanynyń bastalýymen quttyqtady. Dala marjanyn egý naýqanyn ashyp bergen Asqarbek Temirbekuly «Bıyl sý lımıtin boljaı otyryp, egin egýdi josparǵa saı bastadyq. Tehnıkalar 100 paıyz talapqa saı, kóktemgi dala jumystaryna qatysýda. Dızel otynynan da eshqandaı tapshylyq joq. Endi tek dıqandarymyzdyń eńbegi eselenip, mol ónim jınaýǵa kúsh salýymyz kerek», dep kúrishshilerge tabys tiledi.
Bıyl qala dıqandary jalpy aýmaǵy 8 myń 750 gektar jerge aýyl sharýashylyǵy daqyldaryn ornalastyrýdy mejelese, onyń ishinde 3 myń 835 gektarǵa basty daqyl kúrish egiledi. Dıqandar sonymen qatar 419 gektarǵa bıdaı, qant qumaıyn 40, arpany 10, sulyny 5, maqsaryny 40 gektarǵa aýmaqqa ekse, mal azyqtyq daqyldardy 1618 gektarǵa, kókónis, baqsha daqyldaryn 2783 gektarǵa ornalastyrýdy josparlaýda.
Sondaı-aq, Syr sharýalary bıyl kúrishti kóshettep egýdi de júzege asyrmaq. Bıyl osy tásilmen kúrishtiń úsh túri 300 gektar aýmaqqa otyrǵyzylmaq. Y. Jaqaev atyndaǵy Qazaq Kúrish ǵylymı zertteý-ınstıtýtynyń basshysy Nurbol Appazovtyń aıtýynsha jańa tásil arqyly kúrishtiń ónimdili artyp, ekonomıkalyq jáne ekologııalyq turǵydan da tıimdi bolmaq.
Bul bastamany «Qyzylordasýshar» óndiristik ýchaskesiniń dırektory Jorabek Nurymbetov te qoldaıdy. Bul onsyz da tapshy sýdy únemdeýge sep bolady.
Aıta keteıik, aǵymdaǵy jyly qaladaǵy aýyl sharýashylyǵy taýar óndirýshileriniń qolynda kóktemgi dala jumystaryna qatysatyn 80 traktor, 21 tirkeme quraldar, 21 soqa, 9 dán sepkish jáne 5 júk kóligi bar. Bıyl kóktemgi dala jumystaryn júrgizýge 514 tonna dızel qajet. Qala boıynsha «RK-Munaı» jáne «Neft-Trans Qyzylorda» tasymaldaýshy operatorlary bekitilip, qazir 250 tonna arzandatylǵan dızel satyp alyndy.