Buǵan deıin qolǵa alyp júrýge qolaıly sómke túrindegi qurastyrmaly «ásem besigimen» kópke tanylǵan tarazdyq ismer, oblystyq sheberler qaýymdastyǵynyń tóraǵasy Pernebek Ahmetov, mine, ulttyq brendimiz – kıiz úı qurylymyn odan ári jetildirip, jańǵyrtýdy qolǵa alyp otyr. Ol jýyrda balasy Aıat ekeýi múddeli taraptarǵa «Han saraıy» kesheniniń jobasyn jasap usyndy.
Sheberdiń aıtýynsha, kıiz úıdiń úlkeni 38, qosalqy úsheýi 24 qanat, jerasty bóligi – tuǵyrymen qosa eseptegende bıiktikteri tıisinshe 16,5 jáne 15 metr kóleminde bolady.
– Bular kádimgi kıiz úıler. Tez qurastyrylady, ári túrli tabıǵı tótenshe jaǵdaılarǵa da tótep bere alady. Kópten oıymda júrgen sharýa edi. Onyń naqty iske asyrylatyn kezi kelgen sııaqty, – deıdi ol. – Vızıttik ortalyqqa laıyqtalǵan kıiz úı kesheniniń aýmaǵy 1400 sharshy metrdi quraıdy, jylý júıesimen qamtamasyz etiledi. Astyńǵy birinshi qabatyna qoıma, ashana, jylý ortalyǵy sekildi sharýashylyq qurylymdar, ekinshi qabatyna qonaqúı, kafe bar ornalastyrylady. «Han saraıy» basqa óńirde emes, 2000 jyldan astam tarıhy bar kóne de jańa qala Tarazda eńsesin tiktese, quba-qup bolar edi. Aldaǵy ýaqytta Jánibek pen Kereı handar eskertkishiniń mańynan boı kótergeli jatqan etnoaýylǵa ornalastyrylýy múmkin. Bolmasa Merki shıpajaıyna, Tekturmas etnotarıhı kesheni aýmaǵyna qoısa da bolady.
Bir atap óterligi, kıiz úılerge tabıǵattyń ózgerý qubylysyna qaraı beıimdelgish qos shańyraq ornalastyrylypty. Olardyń negizgi tirek-taıanyshy dál ortasyna samuryq qustyń jumyrtqasy – altyn tústi shar ornalasqan báıterek-ustyn bolmaq.
Jobasy tıisti taraptardan qoldaý taýyp, qurylysy qolǵa alynyp jatsa, bul shyn máninde de Gınnestiń rekordtar kitabyna kiretin-aq dúnıe-aý.
Baımahanbet AHMET,
jýrnalıst
TARAZ