Bıyl Soltústik Qazaqstanda qys óte sýyq boldy, onyń ústine qar da qalyń tústi, dep habarlaıdy Egemen.kz.
Aýanyń temperatýrasy -40 gradýstan asqan kezder basqa jyldarǵa qaraǵanda jıi boldy. Mine, osy qys ta aıaqtalyp, jylytý maýsymy toqtatyldy.
Qala ákimi Bolat Jumabekovtyń aıtýyna qaraǵanda qalanyń jylý júıesine qaraıtyn 4,5 myń ǵımarattyń, onyń ishinde áleýmettik salanyń 188 úıiniń birde-birinde sýy qatqan nemese qubyry jarylǵan sııaqty shekten shyqqan apatty jaǵdaı bolǵan joq. Buǵan qysqa daıyndyqtyń muqııat júrgizilgendiginiń arqasynda qol jetkizilgen. Jylý júıelerinde 51 zaqymdaný jóndelip, 230 shaqyrymdyq bitelgen qubyrlar aýystyrylǵan.
Biraq turǵyn úılerdiń sýyqtyǵyna shaǵym aıtylǵan 167 aryz túsken. Olardyń bári de óz ýaqytynda tekserilip, tıisti sharalar qoldanylǵan. Máselen, Jambyl kóshesindegi 123 úıdiń turǵyndary aqpan aıynda úıleriniń sýyqtyǵyn aıtyp shaǵymdanǵan. Tekseris barysynda PIK jylytý qubyrlaryn tazalamaǵany, qysqa daıyndyq pasportyn almaǵandyǵy anyqtalǵan. Sonyń kesirinen úıge ystyq sý tolyq jetpegen. PIK-tiń tóraǵasy turǵyndardyń ózderine kiná artyp, páter aqysyn tólemeı, 1,5 mln teńge qaryz bolyp otyrǵandaryn aıtqan.
Qalanyń kommýnaldyq qyzmetteri jarty kúnniń ishinde boıy tattanyp, jylý ótkizbeı jatqan qubyrlardy aýystyrǵan.
Bul jumysty PIK tóraǵasy atqarýy tıis bolǵanymen, óz kásipterine salǵyrttyq tanytqan.
Úılerdiń jylý júıelerinen ystyq sýdyń ótýine kedergi bolatyn taǵy bir sebep – qubyrlardy aýystyrǵanda balanstyq talaptyń saqtalmaıtyndyǵy kórinedi. Atap aıtqanda, jertólelerdi jóndegende PIK-ter úlkenirek dıametrli qubyrdyń ornyna baǵasy arzan dep jińishkesin ornatqan. Al budan balans saqtalmaı, syrttan kelgen ystyq sý erkin júre almaı qalady. Sonyń kesirinen úılerge de ystyq kúıinde jetpeıdi eken. Negizinen osyndaı jaýapsyzdyqtardyń saldarynan úılerdiń temperatýrasy sýyqtaý bolǵan.
«Jalpy alǵanda Petropavldyń jylýmen qamtylýy bıylǵy qysta shtattyq rejimde boldy», degen qala ákimi Bolat Serikuly jańa maýsymǵa daıyndyq boıynsha atqarylatyn jumystar týraly da aıtty.
Sonyń ishinde «Jas órken», «Solnechnyı» sııaqty jańa shaǵynaýdandarda jylý júıeleri kúsheıtiletinin jetkizdi.
PETROPAVL