«Bolashaqqa» qujat qabyldaý bastaldy

Qujattar 2021 jylǵy 4 mamyrdan bastap 28 qazanǵa deıin eGov.kz memlekettik qyzmetter por­taly arqyly qabyldanady. Stı­pen­dııa úsh kezeńde – maýsym, tamyz jáne qarasha aılarynda taǵaıyn­dalady.

Bıyl «Bolashaq» baǵdarlamasy boıynsha oqý úshin 1 055 stıpendııa bólindi. Olardyń ishinen 555 stıpendııa magıstratýra, rezıdentýra, doktorantýra jáne taǵylymdama baǵdarlamasy boıynsha al 500 stıpendııa taǵylymdamalardyń jańa «Ǵalymdar» sanaty boıynsha bólindi. Bul sanatty Shetelde kadr­lar daıarlaý jónindegi respýb­lıkalyq komıssııasy Qazaqstan Respýblıkasynyń Pre­zıdenti Qa­sym-Jomart Toqaevtyń tapsyr­ma­­syna sáıkes álemniń jetekshi ǵy­ly­mı ortalyqtarynda jyl sa­ıyn 500 ǵalymnyń taǵylym­damadan ótýin qamtamasyz etý maqsatynda bekitti.

2021 jyly stıpendııanyń ashyqtyǵyn arttyrýǵa baǵyttalǵan birqatar jańashyldyqtar engizildi. Osylaısha, «Bolashaq» baǵdarlamasy boıynsha oqýǵa usynylatyn joǵary oqý oryndarynyń tizimi alǵash ret 3 jylǵa bekitildi. Bul format úmitkerlerge «Bolashaq» stıpendııasyn taǵaıyndaýǵa arnalǵan konkýrstyq irikteýge qatysýdy jos­parlaý men daıyndalýda qolaıly jaǵdaı jasaý maqsatynda engizildi.

2021-2023 jyldarǵa arnalǵan «Bolashaq» baǵdarlamasy sheń­berinde oqý úshin usynylatyn shet­eldik joǵary oqý oryndarynyń tizimine eki jáne odan da kóp akademııalyq reıtıngterdiń (QS World University Rankings, Academic Ranking of World Universities, Times Higher Education) top-25 pozısııasyna kiretin 27 elden 207 joǵary oqý orny kirdi.

Bıyl «Bolashaq» baǵdarlamasy boıynsha Basym mamandyqtar tizbesi akademııalyq oqý úshin 80 mamandyqty jáne taǵylymdamadan ótý úshin 137 mamandyqty kózdeıdi. Osy jyly basym mamandyqtar «Bilim berý», «Medısına», «Inno­va­sııalar men jańa tehnologııalar», «Indýstrıaldyq ınjenerııa», «Ja­ratylystaný ǵylymdary», «Áleý­mettik ǵylymdar» jáne «Kreatıvti ındýstrııa» sııaqty baǵyttar boıynsha bólindi.

2021 jyly tizbege «Inklıýzıvti bilim berý», «Qashyqtan bilim berý ádistemesi men ádisnamasy», «Epıde­mıologııa», «Immýnologııa», «Vırý­sologııa», «Ýrbanıstıka», «Úlken derekterdi taldaý», «Jańa materıal­dar tehnologııasy», «Robot tehnıkasy», «О́nerkásiptik avtomattanlyrý» sekildi ózekti mamandyqtar engizildi.

Sonymen qatar bıylǵy basym mamandyqtar tizbesinde ekono­mıka­nyń damýyna yqpal etetin ınno­va­sııalyq mamandyqtardy birik­tiretin «Innovasııalar men jańa tehnolo­gııalar», «Kreatıvti ındýs­trııa» jańa baǵyttarynyń paıda bolýy ma­ńyzdy erekshelik bolyp tur. Bul tizbe eldegi eńbek naryǵy qajet­tilik­teriniń orta merzimdi boljamyn eskere otyryp, memlekettik organ­dar men túrli uıymdardyń ótinimderi negizinde ázirlendi.