Qasym-Jomart Toqaevqa ulttyq kompanııanyń jumysy men júzege asyrylyp jatqan jobalar jaıynda málimet berildi, dep habarlaıdy Egemen.kz Aqordaǵa silteme jasap.
Nurlan Saýranbaevtyń aıtýynsha, 2021 jyldyń birinshi toqsanynda júk aınalymynyń kólemi pandemııaǵa qaramastan 53,4 mıllıard tonna-shaqyrymdy quraǵan, bul ótken jylǵy osy kezeńniń deńgeıimen sáıkes keledi. Bıylǵy qańtar-naýryz aılarynda «Qazaqstan temir joly» UK» AQ jelisinde 60 mıllıon tonnadan astam júk tıeldi. Bul byltyrǵy jyldyń sáıkes kezeńimen salystyrǵanda 2 paıyzǵa artyq. El ishinde 40 mıllıon tonnadan astam júk tasymaldandy, atalǵan kórsetkish ótken jylmen salystyrǵanda 3 paıyzǵa ósken.
Budan bólek Prezıdentke júrgizilgen kelissózderdiń arqasynda Alashańqaı – Dostyq jáne Qorǵas – Altynkól shekaralyq ótkelderinde uzaq turyp qalǵan jabyq vagondar máselesi sheshimin tapqany jaıynda aıtyldy.
Sonymen qatar pandemııaǵa baılanysty jolaýshylar sany 2020 jyldyń sáıkes kezeńimen salystyrǵanda 19,5 paıyzǵa tómendegen.
«Qazaqstan temir joly» UK» AQ basshysy tranzıttik áleýetti, onyń ishinde, Qytaı – EýroOdaq – Qytaı baǵytyndaǵy tranzıttik konteınerlik tasymaldy damytý, vagondar men lokomotıvter parkin jańartý, magıstraldyq temirjol jelisin jańǵyrtý jónindegi jobalar, sondaı-aq, sıfrlyq transformasııa jáne kompanııanyń qarjylyq ornyqtylyǵy boıynsha qabyldanyp jatqan sharalar týraly aıtty.
Kezdesý sońynda Qasym-Jomart Toqaev Nurlan Saýranbaevqa birqatar naqty tapsyrma berdi.