Temirjolshylar kovıdke qarsy sanıtarlyq talaptardy saqtaı otyryp, osy jyldyń birinshi toqsanynda temir jol tósemine jaqyn jerde turatyn turǵyndar arasynda temir joldarda bolý qaýpi týraly 840-tan astam aldyn alý áńgime ótkizdi.
Stansa men depo qyzmetkerleri temir jolda bolý erejelerin únemi túsindirip otyrady. Is-sharanyń basty maqsaty – qaýipti aımaqta azamattardyń jaraqattanýy jaǵdaılarynyń aldyn alý. Temirjolshylar temir joldy belgilenbegen jerden kesip ótetin adamdar shoıyn joldyń boıynda apat týdyratynyn aıtady. Beıqam jaıaý júrginshi úshin joldyń qysqarýy ýaqyt únemdiligi emes, aýyr zardaptarǵa ákeledi. Jelilik polısııa, áskerılendirilgen kúzet, magıstraldyq jeli qyzmetkerlerimen birlesip, qańtar-naýryz aralyǵynda temir joldar arqyly adamdardyń jappaı ótýine ruqsat etilmegen oryndarǵa 380-ge jýyq reıd júrgizildi. Alǵashynda tártip buzýshylarǵa eskertý jasaldy. Sonymen qatar olarǵa temir joldyń qaýiptiligi joǵary aımaq ekendigi týraly dárister oqyldy. Temir joldarmen júrýge tyıym salynady, bul úshin arnaıy belgilengen jáne jabdyqtalǵan oryndardan: jaıaý júrginshiler ótkelderinen, kópirlerden, tıisti belgilermen belgilengen jerlerden ǵana ótý kerek.
Temir jol janynda qulaqqap kııýge, jyljymaly quramnyń astynan ótýge, kele jatqan nemese jóneltilgen poıyz janymen jolaýshylar platformasy boıymen júgirýge, vagondarǵa jabysýǵa tyıym salynady.
Uqypsyzdyq pen temir jol erejelerin saqtamaý densaýlyqtan aıyrylý men ólimge ákelýi múmkin.