Bul týraly Qyzylorda oblysy kásipkerler palatasynyń dırektory Ǵalymbek Jaqsylyqov aıtty, dep habarlaıdy Egemen.kz.
Palata dırektory «Ashyq» jobasy arqyly jumysyn júrgizýge nıetti kásipkerler qatarynyń artyp kele jatqandyǵyn jetkizdi.
«5 mamyrdaǵy aqparat boıynsha oblys kóleminde 52 kásipkerlik nysan QR kod alǵan. Olardyń 26-sy testtik rejımnen sátti ótken, qalǵan 25-i jumysyn testtik rejımde júrgizýde. Atalmysh nysandardyń ishinde basymdyq qoǵamdyq tamaqtaný salasynda, 34-i «Ashyq»-qa endi», - dedi Ǵalymbek Jaqsylyqov.
Munan ózge, 8 kompıýterlik klýb, 2 basseın, 2 kınoteatr, 2 spa-ortalyǵy, 2 bılıard, 1 boýlıng jáne 1 saýna da «Ashyq» jobasy aıasynda jumys jasaý jóninde sheshim qabyldapty. «Ashyq» ásirese qoǵamdyq tamaqtaný salasyndaǵy kásipkerler úshin tıimdi bolyp otyr.
Palata basshysy «Ashyq» jobasyna engen kásipkerlerdiń birqatar artyqshylyqtarmen jumys jasaıtyndyǵyn, jalpy jobanyń jumys jasaý mehanızmin túsindirý maqsatynda qalalyq jáne oblystyq monıtorıngtik top músheleri arasynda túsindirme jumystary júrgizilgendigi jóninde habardar etti.