Bolgarııanyń astanasy – Sofııada Olımpııa oıyndarynyń sońǵy joldamalary sarapqa salynýda. Búgingi jarys kúnin grek-rım kúresi sheberleri qorytyndylaýda, dep habarlaıdy Egemen.kz.
О́kinshike qaraı, 97 kelige deıingi salmaqta beldesken Oljas Syrlybaı alǵashqy aınalymda japonııalyq Iýta Naramen kezdesip, 1:2 esebimen jeńilip qaldy. Sol sekildi Álimhan Syzdyqovtyń da joly bolmady. 130 kılo salmaqta kúsh synasqan qandasymyz rýmynııalyq Alen Alekýk Chýrarıýǵa ese jiberdi. Negizi bul báseke 1:1 esebimen teń aıaqtalǵan edi. Alaıda sońǵy upaıdy qarsylasy jasaǵandyqtan jeńis sonyń ýysynda ketti.
67 kılo salmaqta óner kórsetip jatqan Almat Kebisbaev tusaýkeser kezdesýinde Venesýelanyń ókili Entonı Haver Palensııa Pýentespen 5:3 esebimen utty. Kelesi kezeńde ol túrkııalyq Enes Basharmen beldesedi.