Pavlodar oblysy Aqtoǵaı aýdanyndaǵy aýyldyq mektepterdiń birinde qyzmet atqarǵan esepshi men ınformatıka pániniń muǵalimi 9 jyldan beri alaıaqtyq áreketterin kásipke aınaldyrǵan, dep habarlaıdy Egemen.kz
«2011 jyly múǵalimniń shotyna 1,3 mln teńge, 2012 jyly 2 mln teńge túsken. Jyl saıyn jymqyrylǵan qarjy kólemi osylaı ulǵaıyp otyrdy», delingen Pavlodar oblystyq sotynyń habarlamasynda.
Belgili bolǵandaı, esepshi qyzmetkerlerdiń jalaqysy boıynsha qujattardy toltyrý kezinde ınformatıka páni muǵaliminiń shotyna artyq soma aýdaryp kelgen. Keıin ustaz ben býhgalter sol somany ózara bólisip alyp otyrǵan.
Alaıda mekteptiń qyzmetkerleri kinálaryn moıyndaǵan joq. Muǵalim artyq soma týraly áńgimeni birinshi ret estip turǵanyn aıtsa, esepshi qarjyny ustazdyń óz ótinishi boıynsha aýdaryp, keıin odan bir tıyn da almaǵanyn alǵa tartady.
Degenmen, aıǵaqtar men kýágerlerdiń sózderi aıyptalýshylardyń kináli ekenin rastady. Sóıtip, muǵalim 5 jylǵa, al býhgalter 6 jarym jylǵa bas bostandyǵynan aıyryldy.