Elordanyń sý aıdyndarynda jylda jaz mezgilinde jazataıym oqıǵalar tirkeledi. Bul kóbine jurttyń tyıym salynǵan oryndarda shomylýy, sý qoımalarynyń janynda alkogol ishýi jáne balalardy qaraýsyz qaldyrýy sebepti bolady. Elordalyq TJ departamenti sý aıdyndaryndaǵy qaýipsizdik erejelerin túsindirip ótti, dep habarlaıdy Egemen.kz Nur-Sultan qalasynyń resmı saıtyna silteme jasap.
Belgilenbegen sý oryndary qaýipti. Sebebi onyń túbi zerttelmegen. Túbinde synǵan áınek, balyq aýlaý tory, sym, armatýra, tas sekildi qaýipti zattar bolýy múmkin. Sondyqtan mundaı oryndarda shomylý qaıǵyly jaǵdaıǵa ákelýi múmkin.
Sondaı-aq ózenderde de shomylý qaýipti. Sebebi ózenniń aǵysy bar. Ásirese jaǵadan uzap ketken adam úshin qaýipti. Jaǵalaýdan neǵurlym alys bolsa ózenniń aǵysy sý betinde de, astynda da qatty bolady.
Sondaı-aq sý quıylǵan tastandy qazanshuńqyrlar da qaýip tóndiredi. Sondyqtan mundaı orynǵa kirýge jáne oınaýǵa qatań tyıym salynady. Arnaıy jabdyqtalǵan jaǵajaılar qaýipsiz bolyp sanalady.
Qazirgi ýaqytta Nur-Sultan qalasynyń aýmaǵynda qaýipsizdik talaptaryna sáıkes shomylýǵa arnalǵan úsh ýchaske bar. Atap aıtqanda Ortalyq jaǵajaı, «Trı peskarıa» jáne «Astanalyq aýla» demalys aımaǵy. Qaladaǵy sý aıdyndarynyń basqa ýchaskeleri shomylýǵa jabdyqtalmaǵan jáne sanksııalanbaǵan, mundaı jerlerde shomylýǵa bolmaıdy.
Jyl saıyn shomylý kezeńi bastalar aldynda tıisti qyzmetter jaǵajaılardy tekserýi tıis. Shomylýǵa bolatyn arnaıy shekarasy belgilenedi, balalar úshin shomylýǵa arnalǵan jeke oryndar jabdyqtalady. Qutqarý qural-jabdyqtary jáne baqylaý munaralary ornatylady.
Qaýipti jaǵdaılar ártúrli bolady. Biraq sebepteri birdeı: óziniń jaı-kúıi men qaýipsizdik erejelerin elemeý, ıaǵnı tyıym salynǵan jerlerde shomylý, uzaq júzý jáne sýda uzaq ýaqyt bolý.
Balalarǵa qatysty jazataıym oqıǵa negizinen eresekterdiń qaraýynsyz qalýynan, denesi qurysyp qalǵanǵa deıin salqyn sýda uzaq shomylýynan bolady. Sondaı-aq júze almaýy, qaýipti oıyndar, arǵy jaǵasyna deıin júzip ótýge umtylýy jáne júze almaǵandyqtan túrli zattarmen júzýi de qaıǵyly aıaqtalyp jatady.
Sý aıdyndarynda mynandaı áreketterge ruqsat etilmeıdi:1) «Shomylýǵa tyıym salynady» belgileri ornatylǵan jerlerde shomylýǵa;2) júzý shekarasyn belgileıtin belgilerden tys júzýge;3) katerlerge jáne basqa da júzý quraldaryna júzip jetýge;4) qaıyqtardan, katerlerden, aılaqtardan, jartastardan, qorshaýlardan jáne basqa da oryndardan sýǵa sekirýge;5) osy maqsattarǵa beıimdelmegen oryndarda sportpen aınalysýǵa, onyń ishinde sporttyq oıyndar oınaýǵa;6) jalǵan dabyl qosýǵa;7) sý aıdyndaryn lastaýǵa, kir jýýǵa, otyn jarýǵa, shomylýǵa bólingen oryndarda 500 metrge deıin kólik jýýǵa jáne jóndeýge;8) shaǵyn kólemdi (onyń ishinde eskekti) sý kólikterine kirýge jáne jaǵajaılar men akvatorııa ýchaskelerinde (adamdardyń qaýipsizdigin qamtamasyz etetin kemelerdi qospaǵanda) manevr jasaýǵa tyıym salynady;9) sý aıdyndarynda qaýipsizdik belgilerin óz betimen alyp tastaýǵa, búldirýge nemese ornatýǵa jol berilmeıdi;10) alkogoldik jáne esirtkilik masań kúıde shomylýǵa;11) tekserilmegen jáne jabdyqtalmaǵan jerlerde súńgýge;12) júzýge arnalmaǵan zattarmen júzýge;13) demalýshylarǵa jaraqat ákelýi múmkin qoqysty jaǵalaýda jáne sheshinetin bólmelerde qaldyrýǵa;14) sý aıdyndaryndaǵy qaýipsizdik belgilerine shyǵýǵa;15) balalarǵa eresekterdiń qaraýynsyz sýǵa túsýine jol berilmeıdi.Esińizde saqtańyz, óz qaýipsizdigińiz óz qolyńyzda!