Keshe Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy. Osylaısha, qazaq qoǵamyn jyldar boıy tolǵandyrǵan jer máselesi túbegeıli sheshimin tapty.
Qazaqstan Prezıdenti jer máselesi men el máselesiniń, ıaǵnı ózi aıtqan «Halyq úninen qulaq asatyn memleket» tujyrymdamasymen ózektes ekendigin taǵy bir márte ańǵartty. Memleketshildik saıasatynyń birizdilikpen júzege asatynyn, onyń nátıjesi halyqtyń oıymen qashanda úndesetinin taǵy bir márte dáleldedi.
El Prezıdenti Qasym-Jomart Toqaev «Jańa jaǵdaıdaǵy Qazaqstan: is qımyl kezeńi» atty Qazaqstan halqyna Joldaýynda «Jerimiz sheteldikterge satylmaıdy. Biraq Úkimet aýyl sharýashylyǵy jerlerin tolyqqandy ekonomıkalyq aınalymǵa engizýdiń ózge ádis-tásilderin ázirleýge tıis» dese, Ulttyq qoǵamdyq senim keńesiniń V otyrysynda sóılegen sózinde: «Halqymyz úshin jer máselesi qashanda asa mańyzdy. Bul – memlekettigimizdiń berik negizi jáne qasıetti sımvoly. Qazaqtyń jeri sheteldikterge satylmaıdy dep birneshe ret aıttym. Bul máselege qatysty qaýesetterdi toqtatý qajet», degen bolatyn. Sóıtip Prezıdent sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyıym salýdy tapsyrdy. Bul Prezıdenttiń zań shyǵarý bastamasy arqyly jedel túrde júzege asyrylýy qajet dep taýyp, Prezıdent Ákimshiligine dál osy máselege baılanysty tıisti zań jobasyn ázirleýdi tapsyrdy. Memleket basshysynyń tapsyrmasyna sáıkes Parlament atalǵan zań jobasyn qysqa merzimde qabyldady.