Soltústik Qazaqstan oblysynyń polıseıleri birneshe urlyq jasaǵan ınternet-alaıaqty ustady, dep habarlaıdy Egemen.kz Polisia.kz-ke silteme jasap.
Soltústik qazaqstandyq polıseıler «Hi-tech» jedel-profılaktıkalyq is-sharasy rejıminde jumys istep jatyr. Onyń maqsaty – qazirgi kezde qylmystyń jyldam tarap kele jatqan túri ınternet-alaıaqtyqqa qarsy kúresý.
Is-shara sheńberindegi kúsheıtilgen jumys nátıjege qol jetkizýge múmkindik berdi. Mysaly, Almaty qalasyna issaparǵa jiberilgen Petropavl qalasy PB krımınaldyq polısııa bóliminiń qyzmetkerleri ońtústik astananyń 27 jastaǵy turǵynyn ustaǵan. Ol oblys ortalyǵynyń turǵyndaryna qatysty kıberalaıaqtyqtyń úsh epızody boıynsha kúdikke ilindi.
Jas jigit ınternetke gúl satý jáne ony jetkizý týraly habarlandyrý ornalastyrǵan, 10-12 myń teńge aldyn ala tólem jasaýdy talap etip, alǵan soń baılanysty úzgen. Atalǵan faktiler QR Qylmystyq kodeksiniń 190-baby 2-b. (Alaıaqtyq) boıynsha Sotqa deıingi tergep-tekserýlerdiń biryńǵaı tizilimine engizildi.
Tergeý áreketterin júrgizý úshin almatylyq Petropavlǵa jetkizildi. Ustalǵan jigittiń uqsas qylmystarǵa qatysy bary tekserilip jatyr.
«Onlaın-saýda jasaý salasy – ınternet alaıaqtardyń alǵash bolyp ıgergen isteriniń biri. Polısııa qyzmetkerleriniń turaqty júrgizgen túsindirý jumysy arqasynda soltústikqazaqstandyqtardyń kóbi jahandyq jelide saýda jasaý kezinde ózderin qalaı ustaý kerektigin bildi. Degenmen, aldyn ala tólemdi talap etý aldaý keń taraǵan ssenarııleriniń biri bolyp qala beredi. Aldaý túrleri jetkilikti, eń bastysy, qandaı jaǵdaı bolmasyn eshkimge jeke derekter men qupııa málimetter: bank kartalarynyń nómiri men cvv-kodyn, sms arqyly keletin qol jetkizý kodynyń qupııa sózderin jibermeý qajettigin esten shyǵarmaǵan jón», deıdi SQO PD Krımınaldyq polısııa basqarmasynyń bastyǵy Pıotr Klımov.
Operasııa bastalǵannan beri polıseıler kıberalaıaqtyq jasaǵan jeti kúdiktini anyqtady.