Búginnen bastap Túrkııada qatańdatylǵan lokdaýn sharalary jeńildetilip, qalypty ómirge kezeń-kezińimen oralyp jatyr, dep habarlaıdy Egemen.kz.
«Qalypty ómir saltyna oralý kúntizbesin 17 mamyrdan bastap jarııalaımyz. Bul – bizdiń úkimet otyrysynyń kún tártibindegi mańyzdy máselelerdiń biri», dedi Rejep Taıyp Erdoǵan.
Sonymen birge prezıdent bılik jumysyna pandemııanyń aıtarlyqtaı keri áser etkenin aıtyp, jaqyn arada kedergilerdi joıýǵa ýáde berdi.
Degenmen R.Erdoǵan qazirgi ýaqytta belgili bir shekteýlerdi joıýdyń sharttary men merzimin naqtylaýǵa indet múmkindik bermeı otyrǵanyn aıtty.
Aıta keteıik, Túrkııada koronavırýsty juqtyrǵandar sanynyń kúrt ósýi naýryz aıynda bastalyp, 16 sáýirde eń joǵary deńgeıge jetti. Osy ýaqytta indetke shaldyqqandardyń sany 63 082-den asyp ketken edi. Osyǵan baılanysty túrik bıligi 29 sáýir men 17 mamyr aralyǵynda elge lokdaýn engizdi.