Bul jóninde Qazaqstan Respýblıkasy Ekologııa, geologııa jáne tabıǵı resýrstar mınıstri Maǵzum Myrzaǵalıevtyń Batys Qazaqstan oblysyna jumys sapary barysynda belgili boldy dep habarlaıdy Egemen.kz.
Batys Qazaqstan oblysy sońǵy birneshe jyldan beri sý tapshylyǵyn kórip keledi. Ásirese bastaýyn Reseı Federasııasy aýmaǵynan alatyn Qaraózen men Saryózenge keletin sý mólsheri kúrt azaıyp, oblystyń ońtústik aýdandarynda turatyn sharýalar erekshe qıyndyq kórýde. Jańaqala óńirindegi Qamys-Samar kólder júıesi túgelge jýyq keýip, ekologııalyq apat deńgeıine jaqyndaǵan.
El Prezıdentiniń tapsyrmasymen Batys Qazaqstan oblysyna arnaıy kelgen Qazaqstan Respýblıkasy Ekologııa, geologııa jáne tabıǵı resýrstar mınıstri Maǵzum Myrzaǵalıev óńirdegi sý arnalarynyń jumysyn da áýeden tekserip shyqty.
Mınıstr áýeli Varfolomeı sý qoımasynyń jaǵdaıymen tanysty. О́ńirdegi sýshylar vedomstvo basshysyna egistikterge sýdyń jetispeýshiligi máselesi men sý qoımalarynyń ahýaly týraly baıandadady.
Oral qalasynan 440, Qaztalov aýdanynyń ortalyǵynan 70 shaqyrym qashyqtyqta, «Kishiózen» ózeninde ornalasqan qoıma memleketaralyq mándegi sý toraby bolyp esepteledi. Qoıma Saryózen sýyn Reseıdiń Saratov oblysy men Qazaqstannyń Batys Qazaqstan oblysyna bólýge, eki oblystyń kóltabandaryna sý óz aǵysymen barýy úshin sý tiregin qurýǵa arnalǵan.
Al Qaraózenge Reseı Federasııasynan keletin sý kólemine táýeldilikti azaıtý úshin qazir jańa sý qoımasyn salý josparlanyp jatqany belgili boldy. Sý qoımasy Qaraózen boıynda, Qaztalov aýdanynyń Jalpaqtal aýylynda ornalasady. Sonymen qatar, óńirdiń ońtústik aýdandaryna Qaraózen men Saryózen arqyly turaqty sý jetip turýy úshin Edil ózeninen 135 mln metr kýb sý alý máselesi qarastyrylýda. Bul maqsat úshin respýblıkalyq bıýdjettten 3,5 mlrd teńge bólý kerek.
«Reseıdiń Edil ózeninen alynǵan sý Varfolomeı qoımasy arqyly Batys Qazaqstan oblysynyń Jánibek, Qaztalov, Jańaqala aýdandaryndaǵy 1637 gektar turaqty sýarmaly egistikke, 44018 gektar kóltabandyq sýarý alqabyna jáne 324700 gektar jaıylymǵa jiberiledi. Budan bólek, Batys Qazaqstan oblysynyń ońtústik aýdandaryndaǵy ekologııalyq ahýaldy rettep otyrý úshin Aıdyn, Saryaıdyn, Qańbaqty jáne Qamys-Samar kól aıdyndaryn sý jiberilip otyrady. Sý qoımasynyń syıymdylyǵy – 23 mln metr kýb» dep habarlady Qazaqstan Respýblıkasy Ekologııa, geologııa jáne tabıǵı resýrstar mınıstrliginiń baspasóz qyzmeti.