Búginde Jambyl oblysy aýmaǵynda koronavırýs indetin juqtyrýdyń 8 723 jaǵdaıy tirkelgen. Al pnevmonııa boıynsha 3 491 jaǵdaı anyqtalǵan. Jedel qabyldanǵan sharalardyń nátıjesinde naýqastan 7 869 azamat saýyǵyp shyqqan. Jalpy, óńirde qaýipti indettiń aldyn alý maqsatynda tıisti jumystar atqarylýda.
Oblystyq densaýlyq saqtaý basqarmasynyń basshysy Áset Qalıevtiń aıtýynsha, aǵymdaǵy jaǵdaıǵa baılanysty bekitilgen josparǵa sáıkes oblystaǵy aýrýhanalarda 2 580 ınfeksııalyq tósek-oryn qory, onyń ishinde 250 reanımasııalyq tósek-oryn qory bar. Oǵan qosa 135 tósek-orynǵa arnalǵan karantındik stasıonarlar jumys isteıdi. Qazirgi kezdegi epıdemııalyq jaǵdaıǵa baılanysty koronavırýspen aýyratyn naýqastardy emdeý úshin qosymsha rezerv retinde 2 180 ınfeksııalyq, onyń ishinde 251 reanımasııalyq tósek-oryn qory ashylady.
«17 mamyr kúngi aqparat boıynsha 2 580 oryndyq ınfeksııalyq stasıonarlarda 1 015, onyń ishinde 250 oryndyq reanımasııada 104 naýqas em qabyldaýda. Al karantındik stasıonarlarǵa 30 azamat ornalastyrylǵan. Jergilikti bıýdjet esebinen ótken jyly emdeý jáne aldyn alý uıymdaryn medısınalyq qural-jabdyqtarmen qamtamasyz etý maqsatynda 2,1 mlrd teńge bólindi. Bólingen qarajat esebinen 1 lıtotrıptor, 4 dana ekspertti klassty ýltradybysty apparat, 1 dana endovıdeohırýrgııalyq keshen, 4 dana vıdeoendostoıka, 3 dana elektrokardıograf satyp alyndy. Sondaı-aq densaýlyq saqtaý mekemeleri 140 dana fýnksıonaldy tósektermen, 100 dana resırkýlıator jáne 1 dana flıýrograf apparattarymen qamtamasyz etildi. Sonymen qatar bıyl medısınalyq uıymdardy tıisti medısınalyq qural-jabdyqtarmen jabdyqtaý maqsatynda 2,5 mlrd teńge bólindi. Nátıjesinde medısınalyq mekemeler vıdeolaproskopııalyq júıe, 5 dana narkozdy tynys alý apparattary, transportty ınkýbator, ókpeni jasandy jeldetý apparattary, ekspertti klasty ýltradybystyq apparat, elektroensefalograftar jáne taǵy da basqa jabdyqtarmen qamtamasyz etiledi», deıdi basqarma basshysy.
Bul rette qaýipti indetpen kúres kezinde memleket tarapynan da tıisti kóńil bólinip otyrǵanyn aıta ketý kerek. О́ńir turǵyndarynyń ómirin saqtap qalý maqsatynda respýblıkalyq bıýdjet qarajaty esebinen lızıng boıynsha oblystyq jedel járdem stansasyna 66 jedel járdem kólikteri, sondaı-aq 53 birlik ókpeni jasandy jeldetý apparaty men 8 jyljymaly medısınalyq keshen alynǵan. Sonymen qatar demeýshilik kómek esebinen aımaqtaǵy emdeý uıymdaryna 122 ottegi konsentratory jáne 14 ókpeni jasandy jeldetý apparattary berilgen. Qaýipti indettiń aldyn alý maqsatynda oblysta barlyq shara qabyldanýda. Osy oraıda Áset Qalıev biryńǵaı dıstrıbıýtormen stasıonar sheńberinde oblystyń densaýlyq saqtaý uıymdaryna 2,8 mlrd teńge kóleminde dárilik zattar men medısınalyq buıymdar jetkizilgenin, onyń ishinde 315 mln teńgege koronavırýs indetin emdeýge jáne onyń aldyn alýǵa arnalǵan dárilik zattar men medısınalyq maqsattaǵy buıymdar jetkizilgenin aıtty. Sondaı-aq búginde biryńǵaı dıstrıbıýtormen ambýlatorııa sheńberinde oblystyń medısınalyq uıymdaryna 3,1 mlrd teńgege dárilik zattar men buıymdar alynǵan. Onyń ishinde «tynys alý joldary aýrýy» nozologııasy jáne «COVID-19 koronavırýs ınfeksııasy» nozologııasy boıynsha 78 mln teńgege alynǵan dárilik zattar men medısınalyq buıymdar bar. Al aımaqta dárilik zattardyń eki aılyq qory qalyptasqan.
Sonymen qatar koronavırýs indetinen qorǵanýdyń tıimdi joly vaksına alý ekeni belgili. Búginde elimizde turǵyndardy vaksınalaý jumystary júıeli túrde júrgizilýde. Jambyl óńiriniń jurtshylyǵy da bul naýqanǵa belsene atsalysýda. Qazirgi kezde oblys boıynsha 18 jastan asqan 582 myń adam koronavırýs indetine qarsy vaksınalaýǵa jatady dep josparlanǵan. Jalpy, oblys boıynsha 42 egý pýnkti bar bolsa, onyń ishinde 14 pýnkt Taraz qalasynda, qalǵan 28 pýnkt aýdandarda ornalasqan. 1 aqpannan bastap oblysqa 1 myń adamǵa arnalǵan 2 myń doza QazCovid-in otandyq vaksınasy, 92 myń 700 doza Spýtnık-V 1 komponenti jáne 11 myń doza Hayat-Vax vaksınasy kelgen. Jalpy, 93 059 tulǵa otandyq QazCovid-in vaksınasymen jáne Spýtnık-V, Hayat-Vax vaksınalarymen ekpe alǵan. Egýden keıingi asqynýlar tirkelmegen.
Jambyl oblysy