«SQ Farmasııanyń» burynǵy basshysy Berik Sháriptiń advokattary sottan bultartpaý sharasyn úı qamaǵyna ózgertýdi surady, dep habarlaıdy Egemen.kz.
Elordadaǵy Esil aýdandyq sotynda mekemeniń eks-basshysy Berik Sháripke qatysty sot otyrysy jalǵasyp jatyr. Buǵan deıin habarlaǵandaı, oǵan QR QK 361-baby (laýazymdyq ókilettikterin teris paıdalaný), 4-bóligi, 3-tarmaǵynyń jáne 287-baptyń (qarýdy, oq-dárilerdi, jarylǵysh zattardy jáne jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) 2-tarmaǵy boıynsha aıyp taǵylyp otyr.
«Keshe 18 mamyrda tergeý ızolıatorynyń ǵımaratyna kirýge ruqsat bergen hatyńyzǵa sáıkes, advokattar barǵan edik. Alaıda, biz óz qorǵalýshymyzben tildese almadyq. Sonymen birge epıdemııalyq ahýal boıynsha Nur-Sultan qalasy «qyzyl» aımaqqa qaıta ótkendikten, Skype platformasy arqyly sóılesýge ýaqyt berildi. Munda da, bizge berilgen ýaqyttyń tyǵyzdyǵyna baılanysty qorǵalýshymmen sóılesýge múmkindik bolmady. Bizge 15 mınýt berilse de, ol azdyq etedi. Oǵan qosa, qujattardy tapsyra almaı, onlaın jelide habarlasýǵa májbúrmiz», deıdi B.Shárip advokattarynyń biri Baýyrjan Bıbatyrov.
Osy oraıda advokat eldiń Konstıtýsııalyq normasyna sáıkes ár azamat bilikti zań kómegine júginýge quqy bar ekenin eske saldy.
«Joǵaryda aıtylǵan talap-aryzdardy eskere otyryp, bultartpaý sharasyn neǵurlym jumsaq bolǵanyn, ári úıqamaqqa alý týraly ótinishti negizge alýyńyzdy suraımyn. Ol úı qamaýynda otyryp, úıden shyǵýǵa shekteý qoıylǵanyn jáne basqa da máseleler bar ekenin biledi. Sondaı-aq qorǵalýshymyz búgingi tańda «SQ Farmasııa» JShS-da jumys istemeıtindikten, sottyń tergeý barysyna esh aralasa almaıtyndyǵyn alǵa tartamyz. Sondyqtan bultartpaý sharasyn úı qamaǵyna ózgertý úshin barlyq negiz bar dep esepteımin», dedi advokat.
Advokattyń bul negizdemesine basqa da qorǵaýshylar qosylyp, onyń kýágerlerge qandaı da bir qysym kórsete almaıtyndyǵyn basa aıtty. Dese de, prokýror málimdemesi advokattardyń pikirine keraǵar. Onyń aıtýynsha, 26 sáýirden bastap negizgi sot úderisi júrip jatqanyn jáne eshkim baılanysqa shaǵymdanbaǵanyn jetkizdi.
«Baılanys birqalypty boldy. Tergeý ızolıatorlarynda kezdesýlerge eshkim tyıym salǵan joq. Siz Skype arqyly máselelerdi talqylaı alasyz. Osyǵan baılanysty ótinishti ózgerissiz qaldyrý kerek dep sanaımyn», dedi prokýror.
Sýdıa Qanat Dúısembıev taraptardy tyńdap bolǵan soń, advokattan ne sebepti qorǵalýshysymen baılanysqa shyǵa almaǵanyn qaǵaz júzinde túsindirýdi surady.
«Qurmetti qorǵaýshy tarap, B.Sháripke qatysty aldyn alý sharalaryn ózgertý qazirgi ýaqytta qarastyrylyp jatyr. Sot óz sheshimin maquldap qoıdy. Degenmen, sot tek belgili sebepterde ǵana, ıaǵnı aýyryp qalǵanda nemese basqa da negizgi sebepteri bolǵan jaǵdaıda ǵana talap-aryzdaryńyzdy qabyldaı alady. Endigi kezekte atalǵan máseleni taǵy qarap, QAJK-ǵa hat daıyndaımyn», dedi sýdıa.