Búginde kóktemgi dala jumystaryna óńir dıqandary belsene kirisýde. Bul rette Qordaı aýdanynda jyl saıyn egiletin dándi-daqyldarmen qatar, jemistiń jańa túrlerin ósirýge de kóńil bólinip otyr.
Qazirgi kezde Sarybulaq aýyldyq okrýginde ornalasqan «Blagoveshenka» JShS qulpynaıdyń «Albıon» surpyn otyrǵyzýdy qolǵa alǵan. Qulpynaıdyń bul erekshe surpynyń jıdegi qatty ári tátti jáne hosh ıisti bolyp keledi. Jınaǵannan keıin de taýarlyq túrin joǵaltpaı, saýda naryǵyna shyǵarýǵa óte yńǵaıly. Ári bul jemistiń kópshiliktiń suranysyna ıe ekendigi de daýsyz.
Atalǵan seriktestiktiń basshysy О́miráli Varshakıdze byltyr qulpynaı kóshetterin 10 gektar alqapqa otyrǵyzyp, odan 5-6 tonna ónim alypty. Bıyl kásipker taǵy da 300 myń túp kóshet satyp alyp, egis kólemin birneshe gektar alqapqa deıin arttyrǵan. Qulpynaı ósirýmen aınalysatyn sharýashylyqqa bul maqsatqa búginde memleket tarapynan qoldaý kórsetilip, 50 paıyz sýbsıdııa berilýde. «Memleket qoldaýynyń nátıjesinde qulpynaıdan mol ónim alýǵa barlyq jaǵdaı jasalǵan. Qulpynaı ósirý tabysy mol jumys. Ol jyl saıyn ónim beredi. Eń bastysy, barlyq tehnologııany muqııat saqtaǵan jón», deıdi О́miráli Varshakıdze.