Qaraǵandy oblysy bir aıdan asa ýaqyt «qyzyl aımaqta» tur. Sondyqtan indetpen kúres is-sharalaryn barynsha kúsheıtken jón. Densaýlyq saqtaý mınıstri Alekseı Soı óńirge jumys sapary barysynda epıdemııalyq ahýalmen tanysyp, halyqty vaksınalaý barysyn tekserdi.
Densaýlyq saqtaý mınıstri Alekseı Soı «Qalalyq alǵashqy medısınalyq-sanıtarlyq kómek ortalyǵy» JShS janyndaǵy №1 Otbasylyq densaýlyq ortalyǵyna bardy. Bul ortalyqtyń bazasynda COVID-19-ǵa qarsy alǵashqy vaksınalaý ortalyǵy uıymdastyryldy. Mınıstr munda vaksınany saqtaýǵa arnalǵan tońazytqysh jabdyqqa qosa, prosedýranyń qaýipsizdigi úshin barlyq jaǵdaıdyń qanshalyqty jasalǵanyn qarap, ekpe saldyrǵysy keletinderdi qabyldaý algorıtminiń saqtalýyna kóz jetkizdi. Ol pasıenttermen áńgimelesip, hal-jaǵdaıyn surap, vaksınalaý pýnktinde jasalǵan jaǵdaı týraly pikirlerin muqııat tyńdady.
«Búgingi tańda óńirde epıdemııalyq ahýal ońalmaı tur. KVI-diń odan ári taralýyna jol bermeý úshin vaksınalaý qarqynyn jedeldetý jáne halyq arasynda ımmýndyq qabat qurý qajet. Úıde emdeýdi jolǵa qoıý, naýqastyń jaǵdaıyn ambýlatorııalyq deńgeıde baqylaý mańyzdy», dedi vedomstvo basshysy.
A.Soı alǵashqy medısınalyq-sanıtarlyq jáne stasıonarlyq kómek deńgeıinde úılestirýdi kúsheıtýge, qaýip tobynyń ókilderimen, sozylmaly aýrýlary bar pasıenttermen jáne qart adamdarmen jumys isteýge erekshe nazar aýdardy. Sonymen qatar KVI boıynsha óńirdegi jaǵdaıǵa jalpy basshylyqty, onyń ishinde pasıentterdi baǵyttaýdy, ambýlatorııalyq jáne stasıonarlyq deńgeıde emdeýdi, muqtaj pasıentterdi ýaqtyly emdeýge jatqyzýdy, MSAK pen stasıonarlar arasyndaǵy aýysýlardy qamtamasyz etý qajet.
COVID-19-ǵa qarsy ımmýndaý boıynsha vaksınalaý ortalyǵy 1 aqpannan bastap jumys istep jatyr. Onda 3 egý kabıneti, 3 dárigerdiń qabyldaý kabıneti, 20 adamǵa baqylaý aımaǵy bólingen. Densaýlyq saqtaý basqarmasynyń málimetinshe, 1 aqpannan bastap Qaraǵandy oblysynda 70 189 turǵyndy vaksınalaý aıaqtaldy. 20 mamyrǵa deıin 149 352 adam birinshi komponentpen vaksına aldy. Onyń ishinde QazVac-ty 1 875, Sinopharm-dy 5 865 adam saldyrdy. Al ekinshi komponentpen vaksına alǵandar – 80 201 adam.
Jalpy Qaraǵandy oblysynda koronavırýs ınfeksııasyn juqtyrýdyń 28 876 jaǵdaıy tirkelgen. Indetten 341 adam qaıtys bolǵan, onyń ishinde negizinen 60 jastan asqan jáne sozylmaly aýrýlary bar adamdar bar.
Mınıstr budan keıin Ahýaldyq ortalyqqa baryp, bul baǵdarlamalyq keshendi tolyq kólemde paıdalanýdy, onyń ishinde mýltıdıssıplınarlyq konsýltatıvtik dárigerlik toptardy, KVI-men kúres sheńberinde qabyldanatyn sharalar boıynsha MSAK uıymdarynyń qyzmetine taldaý júrgizýdi tapsyrdy.
A.Soı osy jumys sapary barysynda koronavırýs ınfeksııasymen kúres jónindegi óńirlik shtab otyrysyn ótkizdi. Onda Qaraǵandy oblysy densaýlyq saqtaý basqarmasynyń basshysy Gamal Toqsambaev óńirde pandemııamen kúreske baǵyttalǵan birqatar is-shara uıymdastyrylǵanyn málimdedi. Aıtalyq, ınfeksııalyq gospıtaldyq ınfraqurylymdy damytý, aýrýdy erte anyqtaý úshin medısınalyq kómek kórsetýdi jetildirý, úı stasıonarlary jaǵdaıynda ýaqtyly oqshaýlaý jáne emdeý sııaqty sharalar qolǵa alyndy. Buǵan qosa stasıonarlar men emhanalarda qajetti dárilik zattardyń, medısınalyq buıymdardyń jáne jeke qorǵanysh quraldarynyń úsh aılyq qory quryldy.
G.Toqsambaev aldaǵy ýaqytta epıdemııalyq jaǵdaıdyń turaqtanýy jáne syrqattanýshylyqtyń birtindep tómendeýi kútiletinin atap ótti.
Qaraǵandy oblysy