Qasym-Jomart Toqaevqa óńirdiń bıylǵy tórt aıdaǵy damý qorytyndylary men Prezıdent tapsyrmalarynyń oryndalý barysy, sondaı-aq, Jambyl oblysynda júzege asyrylyp jatqan jobalar men Qordaı aýdanyndaǵy ahýal jóninde baıandaldy, dep habarlaıdy Egemen.kz.
Berdibek Saparbaev qańtar-sáýir aılarynda Jambyl oblysynyń ónerkásip kórsetkishi 107,1 paıyzǵa, aýyl sharýashylyǵy 103,2 paıyzǵa, qurylys 110,3 paıyzǵa artyp, óńirge quıylǵan ınvestısııa 75,2 mıllıard teńgege jetkenin aıtty. Sonymen qatar byltyr oblysta 768 myń gektar jerge egin egilse, bıyl egistik alqap 46 myń gektarǵa ulǵaıǵan.
Oblystaǵy epıdemıologııalyq jaǵdaı da sóz boldy. Jalpy 2580 tósek-oryn ázirlengen. Medısınalyq qural-jabdyqtarmen qamtý tıisti dárejede júrgizilip, dárilik zattardyń jetkilikti qory qalyptasqan. Jospar boıynsha 582 myń azamatqa vaksına salý kerek bolsa, búginde 100 myń adamǵa ekpe egilgen.
Aımaqta Prezıdent tapsyrmasyna sáıkes ózge ult ókilderi tyǵyz shoǵyrlanǵan 25 eldi mekenniń etno kartasy jasaqtalǵan. Memleket basshysyna Qordaı aýdanyndaǵy ahýal jóninde baıandaldy. Oblys ákiminiń aıtýynsha, aýdandaǵy jaǵdaı turaqty. Byltyr turǵyn úı, jol qurylysy, bilim berý, medısına, mádenıet jáne sport salalary boıynsha jalpy quny 35,1 mıllıard teńge bolatyn 392 joba iske asyrylǵan. Barlyq zardap shekken nysandar men turǵyn úıler tolyǵymen qalpyna keltirilgen.
Gvardeısk aýylyndaǵy Bıologııalyq qaýipsizdik problemalary jónindegi ǵylymı-zertteý ınstıtýtynyń bazasynda otandyq ımmýndyq preparattar shyǵaratyn zaýyttyń qurylys-montaj jumystary aıaqtalyp, tıisti qondyrǵylardy ornatý jumystary júrgizilýde. Zaýyttyń synamalyq qosylýy maýsym aıyna belgilengen.
Memleket basshysy oblystaǵy epıdemııalyq ahýaldy baqylaýda ustaý, ınvestısııa tartý jáne memlekettik baǵdarlamalardy tıimdi júzege asyrý jumystaryn jandandyrý jóninde tapsyrma berdi.