Memleket basshysyna qazirgi qalyptasqan epıdemıologııalyq jaǵdaı, áleýmettik máseleler, Jer komıssııasy jumysynyń qorytyndylary týraly baıandaldy, dep habarlaıdy Egemen.kz.
Eraly Toǵjanov Prezıdentke elimizdegi epıdemıologııalyq ahýaldy turaqtandyrý jóninde aıtty. Bıylǵy 1 mamyrdan bastap koronavırýs indetin juqtyrǵandardyń sany 0,9 paıyzdan 0,49 paıyzǵa tómendegen. Aýrýhanaǵa túsken adamdar 41 paıyzdan 34 paıyzǵa azaıǵan.
Sonymen qatar elimizge COVID-19 indetine qarsy vaksınanyń 2,3 mıllıon dozasy jetkizilgeni aıtyldy. Mamyr aıynyń sońyna deıin qosymsha 2 mıllıon doza ekpe jetkizý josparlanýda. Shilde aıynan bastap otandyq «QazVac» vaksınasyn óndirý 500 myń dozaǵa deıin ulǵaıady.
Premer-Mınıstrdiń orynbasary Memleket basshysyna «Ashyq» jobasynyń engizilýi jaıynda málimet berdi. Búginde 1,5 mıllıon qazaqstandyq atalǵan qosymshany belsendi paıdalanýda. Al jobaǵa 7 myńǵa jýyq shaǵyn jáne orta bıznes sýbektileri tirkelgen. «Ashyq» jobasynyń engizilýi kásipkerlerdiń úzdiksiz jumys isteýine múmkindik berdi. Sondaı-aq indet juqtyrǵan 2,5 myńnan astam adam jáne dertke shaldyqqan naýqastarmen baılanysta bolǵan 2 myń azamattyń karantın rejımin buzǵany anyqtalǵan. Prezıdent bul baǵytta atqarylǵan jumysqa oń baǵa berdi.
Eraly Toǵjanov Memleket basshysyna farmasevtıka ónerkásibin, ǵylymdy damytýǵa, Salaýatty ómir saltyn saqtaý tujyrymdamasy men Áleýmettik kodeksti ázirleýge, jumyssyzdyqtyń aldyn alýǵa qatysty qolǵa alynǵan sharalar týraly aıtty.
Qasym-Jomart Toqaev buǵan deıin Túrkistan oblysynyń Baǵys jáne Hııabon aýyldaryndaǵy jaǵdaıdy retteýge qatysty Úkimetke tapsyrma bergen bolatyn. Soǵan sáıkes, eldi mekenderge resmı mártebe berilip, shekaralary naqtylanyp, turǵyndardyń jer ýchaskeleri men dúnıe-múlikteriniń tizimi jasaldy. Shilde aıynda aımaqtaǵy 6 aýyl tabıǵı gazben qamtamasyz etiledi, kelesi jyly Baǵysta 300 oryndyq mektep salynady.
Prezıdentke Jer komıssııasynyń jumys qorytyndylary jaıynda da esep berildi. Komıssııa jumysynda 121 másele qarastyryldy. Qazirgi tańda túzetýler engizilgen tıisti zań jobasy Parlament Májilisiniń qaraýynda jatyr.
Kezdesý sońynda Memleket basshysy bilim jáne ǵylym, densaýlyq saqtaý, mádenıet, áleýmettik qorǵaý máselelerine qatysty birqatar tapsyrma berdi.