Batys Qazaqstan oblysynda bıyl 111 myńǵa jýyq oqýshy oqý jylyn aıaqtady. Olardyń 5916-sy 11 synyp bitirip, úlken ómirge qanat qaqpaq. О́ńirde 430 oqýshy Altyn belgiden, 185 oqýshy úzdik attestattan úmitti, dep habarlaıdy Egemen.kz.
Pandemııanyń sebebinen dástúrli qalpy buzylyp, toqsan túrlengen 2020-2021 oqý jyly da aıaqtaldy. Bul kezeń ustaz úshin de, shákirt pen ata-ana úshin de ońaı bolǵan joq. Sońǵy eki aıdan artyq ýaqyttan beri «qyzyl aımaqtan» shyqpaǵan Batys Qazaqstan oblysynda sanıtarlyq-epıdemıologııalyq jaǵdaıǵa baılanysty sońǵy qońyraý saltanaty tek mektep bitirýshi 9 jáne 11 synyp túlekterine arnalyp ótti.
– Mektep túlekteriniń qorytyndy attestattaýy 28 mamyrda bastalady. 9-synyp oqýshylarynyń qorytyndy emtıhandary 28 mamyr men 5 maýsym aralyǵynda ótedi. Olar úsh pán boıynsha qorytyndy attestattan ótedi. Al 11-synyp oqýshylarynyń memlekettik emtıhandary 1-10 maýsym aralyǵyna qoıyldy, – deıdi oblystyq bilim basqarmasynyń basshysy Aıgúl Myńbaeva.
Mektep bitirýshiler tórt pán boıynsha emtıhan tapsyrmaq. «Altyn belgige» úmitkerlerdiń jazba jumysyn bilim basqarmalary janynan qurylǵan komıssııa tekseredi. Komıssııa quramyna bilikti, tájirıbeli muǵalimder kirgen. Buryn mektep pen bilim bólimderi úmitkerlerdiń jumysyn ózderi tekserip, «Altyn belgini» tapsyrý týraly sheshim qabyldaıtyn edi. Bıyl mektepter burynǵydaı oqý ozattarynyń tizimin ózderi jasaı almaıtyn bolǵan.
Pandemııa bıyl dástúrli oqý yrǵaǵyn buzǵany belgili. Sondyqtan ata-analardyń ótinishi boıynsha «jazǵy mektep» uıymdastyrylatyn boldy. Negizgi maqsat – pandemııa, shekteý sharalary kezeńinde jiberilgen bilim olqylyǵynyń ornyn toltyrý. 26 mamyr men 19 maýsym aralyǵynda jumys isteıtin jazǵy mektepterde oblystaǵy oqýshylardyń 55,5%-y, ıaǵnı 53509 shákirt nıet bildirip otyr. Osylaısha 376 mektepte qońyraý úni áli biraz shyǵatyn boldy.
О́tken jyly oqýshylar pandemııanyń sebebinen jazǵy demalysyn uıymdastyrylǵan ortalyqtarda, lagerlerde ótkize almady. Al bıyl elimizdiń Bas sanıtar dárigeri balalardyń qala syrtyndaǵy saýyqtyrý lagerlerinde demalýyna, em alýyna ruqsat berip otyr. Árıne, barlyq qaýipsizdik sharalary jasalady. Qazir oblysta qala syrtyndaǵy 20 lager bar.
– Jazǵy saýyqtyrý lagerlerine qyzmetkerler COVID-19-ǵa zerthanalyq zertteýden ótip nemese COVID-19-ǵa qarsy vaksınasııanyń tolyq kýrsyn alǵan soń ǵana qabyldanady. Balalar da lagerge densaýlyq jaǵdaıy týraly qujatymen, 72 saǵat ishinde júrgizilgen PTR test qujatymen kelýi tıis, – deıdi Aıgúl Ádilgereıqyzy.
О́ńir «qyzyl» aımaqta bolǵandyqtan, mektep janynan jazǵy demalys oryndary ashylmaıtyn boldy.