Keshe Premer-Mınıstrdiń birinshi orynbasary О́mirzaq Shókeevtiń tóraǵalyǵymen keńes bolyp ótti. Onda respýblıkadaǵy strategııalyq mańyzdy sýly nysandardyń jaǵdaıy men “Astana qalasyn Esil ózeniniń tasqyn sýlarynan qorǵaý” jobasy qurylysynyń aıaqtalý máselesi sóz boldy.
Aldymen Astana ákiminiń orynbasary Sergeı Horoshýn Astana qalasyn tasqyn sýlardan qorǵaý maqsatynda salynǵan bógettiń jumysy týraly baıandap berdi. Bul nysan Úkimet qaýlysymen 2006 jylǵy strategııalyq mańyzy joǵary “Astana qalasyn qorǵaý” atty basymdyq berilgen ınvestısııalyq jobalar sanatyna engen bolatyn. Qala ákimi orynbasarynyń sózine qaraǵanda bóget áli tolyq iske qosylmaǵanymen, Vıacheslav sý qoımasyna syımaǵan 30 mln. tekshe metr sýdy ózine qabyldapty. Osy qolǵa alynǵan shara Astananyń jekelegen aýmaqtaryn sý basý qaýpinen saqtap qalǵan kórinedi. Búgingi kúni Vıacheslav sý qoımasynyń kólemi 400 mln. tekshe metr sýdy quraıdy. Artyq sýdy bógetke jiberý arqyly jaǵdaı turaqtalǵan. Al jańa bógettiń qurylysy bıyl aıaqtalady dep josparlanyp otyr.
Sergeı Horoshýnnyń aıtýynsha, Vıacheslav sý qoımasy arnasynan tasyǵan jaǵdaıda, Esildiń sol jaǵalaýy men áýejaı mańynda ornalasqan birneshe eldi meken sý astynda qalýy múmkin eken. Áıtse de aldyn alý sharalary nátıjesinde bul qaýip oryn alǵan joq. Qazir Vıacheslav sý qoımasynda óziniń jobalyq syıymdylyǵy boıynsha 410 mln. tekshe metr sý bar, sonymen birge bógette taǵy 30 mln. tekshe metr sý bar. Endi bul sýdy qalaı tıimdi paıdalanatynymyzdy oılaný qajet, degen О́mirzaq Shókeev bıylǵy jylǵy elimizde qalyptasqan erekshe ylǵaldylyq jaǵdaıy týraly baıandady.
Kóshpeli otyrysta jańa bógetti bolashaqta tıimdi paıdalaný jáne jınalǵan sýdy kezeń-kezeńimen Esil ózenine ótkizý úshin salynyp jatqan arnalardy tezirek bitirip, qoldanysqa berý tapsyryldy. Arnalar qurylysyna bıýdjetten 740 mln. teńge bólinip, onyń birinshi kezegi aıaqtaldy. Qurylys aldaǵy qyrkúıektiń 1-ine deıin tolyǵymen aıaqtalyp, arna Esil ózenimen jalǵastyrylatyn bolady.
Ábdirahman QYDYRBEK.