Aımaqta quqyqbuzýshylyq pen qylmystyń aldyn alý, sondaı-aq kámeletke tolmaǵandardy qylmystyq ortaǵa tartýdy boldyrmaý maqsatynda aǵymdaǵy jyldyń 25 mamyrynda Jambyl oblysynyń barlyq mektepterinde «Sońǵy qońyraý» merekesine arnalǵan is-sharalar kezinde polısııa qyzmetkerleri jastar kóp jınalatyn oryndarda patrýldik qyzmet jasaqtarynyń tyǵyzdyǵyn kúsheıtken bolatyn, dep habarlaıdy Egemen.kz.
Sonymen qatar shomylý oryndary da baqylaýǵa alyndy. Qoǵamdyq tártipti buzýdy, onyń ishinde mektep oqýshylarynyń qatysýymen oryn alýy múmkin jol-kólik oqıǵalarynyń aldyn alýǵa qatysty jaǵdaıdy baqylaý maqsatynda quramynda oblystyq Polısııa departamentiniń Jergilikti polısııa qyzmeti basqarmasy, qalalyq jáne aýdandyq polısııa bólimderiniń basshylary bar jedel shtabtar quryldy.
«Kafeler men meıramhanalarda mektep bitirý keshin toılaýǵa nemese shaqyrylǵandar kóp jınalatyn osyndaı is-sharalardy ótkizýge tyıym salynady. Taraz qalasynyń qyzyl aımaqta ekendigin umytpaýymyz kerek. Osyǵan baılanysty barlyq oıyn-saýyq oryndary quqyq qorǵaý organdarynyń jiti nazarynda bolady», deıdi oblystyq Polısııa departamenti Jergilikti polısııa qyzmeti basqarmasy ıývenaldy polısııa tobynyń erekshe tapsyrmalar jónindegi aǵa ınspektory, polısııa polkovnıgi Qýanyshbek Qaljanov.
Alaıda, mobıldi toptar júrgizgen reıd barysynda ishki ister organdaryna kámeletke tolmaǵan 72 bala jetkizildi. Sonymen qatar 76 ata-ana men ózge de zańdy ókilder ákimshilik jaýapkershilikke tartyldy.
«Kámeletke tolmaǵandardyń túngi ýaqytta oıyn-saýyq mekemelerinde bolǵany úshin eki kafe-bardyń ıesi jaýapkershilikke tartyldy. Dúkenniń eki ıesi alkogol ónimderin satý erejeleri týraly Qazaqstan Respýblıkasynyń zańnamasyn buzǵany úshin, 71 ata-ana kámeletke tolmaǵan balalarynyń túngi ýaqytta oıyn-saýyq mekemelerinde jáne turǵyn úıden tys jerde bolǵany úshin ákimshilik jaýapkershilikke tartyldy. Ata-analyq mindetterin tıisinshe oryndamaýdyń 1 deregi anyqtaldy. Tutastaı alǵanda, oblys boıynsha is-sharalar ótkizý barysynda tótenshe jaǵdaılar oryn alǵan joq. Kámeletke tolmaǵandardy zańsyz áreketterge tartý derekteri anyqtalmady», deıdi Qýanyshbek Qaljanov.
Jambyl oblysy