Densaýlyq saqtaý mınıstri Alekseı Soı vedomstvonyń burynǵy basshysy Eljan Birtanovpen qarym-qatynasy týraly suraqqa jaýap berdi, dep habarlaıdy Egemen.kz.
«Siz mınıstr bolyp taǵaıyndalǵanda, jyly lebiz bildirip, Eljan Birtanovqa densaýlyq tiledińiz. Qazir ol qylmystyq iske qatysy bar dep aıyptalyp otyr. Qazirgi qarym-qatynastaryńyz qandaı?», degen jýrnalıstiń suraǵyna Soı jaýap berdi.
«Qandaı jaǵdaıda da biz áriptespiz. Birneshe jyl birge jumys istedik. Men onyń basshylyǵymen vıse-mınıstr bolyp jumys istedim. Árıne, ony jaqsy bilemin. Qylmystyq iske qatysy bar ekeni aıtylǵanǵa deıin onymen sóılesip turatynbyz. Qazir árkimniń óz baǵyty bolýyna baılanysty aramyzda eshqandaı qarym-qatynas joq. Bizde eshqandaı túsinispeýshilik joq. Áriptestermiz», dep jaýap berdi Alekseı Soı.
Aıta keteıik, sotta prokýror Tólegen Jaraspaev Eljan Birtanov pen burynǵy densaýlyq saqtaý vıse-mınıstri Oljas Ábishevke asa iri kólemde - 1,5 mıllıard teńge nemese 4,1 mıllıon dollar somasynda memleketke materıaldyq zalal keltirdi degen aıyp taqqan bolatyn.
6 mamyrda Eljan Birtanovtyń úıqamaqtaǵy merzimi 2021 jyldyń 14 maýsymyna deıin uzartyldy.