Densaýlyq saqtaý mınıstri Alekseı Soı jýrnalıst Nartaı Aralbaıulynyń YouTube-kanalyna bergen suhbatynda koronavırýsqa qarsy otandyq QazVac vaksınasyna 10-ǵa jýyq el qyzyǵýshylyq tanytqanyn aıtty, dep habarlaıdy Egemen.kz.
«Biz úlken belsendilikti kórdik. Negizinde bizdiń vaksına – musylman álemindegi tolyǵymen jasalǵan jáne shyǵarylǵan alǵashqy vaksına. Kóptegen musylman memleketi bizge júginedi. Jaqynda BAÁ-degi áriptesimmen sóılestim, olar qyzyǵýshylyq tanytyp otyr. Bizge Qatardan júgindi. Barlyǵy 10-ǵa jýyq el QazVac-ty jetkizý máselesi boıynsha júgindi. Qazir osy baǵytta jumys istep jatyrmyz, avtorlyq quqyqty tirkeımiz. Bizdiń ınstıtýt bolashaqta QazVac-ty ǵana emes, basqa da vaksınalardy halyqaralyq patent alyp jatyr», dedi A.Soı.
Odan ózge ol koronavırýsqa qarsy vaksınany kóptegen damyǵan el jasaı almaı otyrǵanda bul Qazaqstannyń qolynan qalaı kelgenin aıtyp berdi.
«Bizdiń ǵalymdar kez kelgen vırýsty bólip alyp, odan vaksına jasaı alatynyn kórsetti. Bul Qazaqstan basqa elderge qaraǵanda aqyldyraq degenim emes. Osyndaı qaýipsizdik deńgeıi joǵary zerthanalar álemde az. Mundaı jabaıy vırýstarmen jumys isteý tájirıbesi kóp elde joq. Osyǵan baılanysty biz jasaı aldyq. Biz bul máselemen kóp jyldar boıy aınalysyp kelemiz», dedi mınıstr.