Sońǵy bir jyl boıy onlaın ótken oqý jyly da aıaqtaldy. Elimizde sońǵy qońyraý soǵylǵan kúni tóbeles te tirkeldi, jol erejesi de óreskel buzyldy. О́kinishke qaraı, dańǵazalyqqa boı uryp, daraqylanyp júrgenderdiń deni – úlken ómirge endi ǵana qadam basqan jas túlekter.
Áleýmettik jelini sharlap ketken Mańǵystaý oblysyndaǵy Beıneý aýyly jastarynyń tóbelesi dál 25 mamyr kúni bolǵan. О́mirlerindegi aıtýly kúndi osyndaı tártipsizdikpen támamdaǵan túlekter aýyldaǵy J.Qaldyǵaraev pen Y.Altynsarın atyndaǵy mektepterdiń oqýshylary bolyp shyqty. Biletin jurt bul Beıneý aýylyndaǵy eki mektep jetkinshekteriniń arasyndaǵy alǵashqy qaqtyǵys emestigin aıtyp jatyr. Jappaı tóbeleske 40-qa jýyq oqýshy qatysqan. Abyroı bolǵanda, tóbeles kezinde eshkim zardap shekpegen. Merekeniń shyrqyn buzǵan tóbelesqumarlardyń 7-ýi ustalyp, mán-jaıdy anyqtaý úshin polısııa bólimine jetkizilgen. Beıneý aýdandyq polısııa bólimi osy oqıǵaǵa qatysty Qylmystyq kodekstiń 293-baby «Buzaqylyq» boıynsha is qozǵady.
Sońǵy qońyraý kúni áperbaqandyǵymen aqtaýlyq oqýshylar da erekshe kózge tústi. Mektep bitirgenderin ózderinshe atap ótken olar kólikterimen drıft jasap, kóńil kótergen. Qaladaǵy avtoturaqtardyń birinde kólikterin «oınaqshytyp», joǵary jyldamdyqta kele jatyp kilt buryla syrǵanatqan jetkinshekter de jazasyz qalmady. Aqtaý qalalyq polısııa basqarmasy patrýldik polısııa batalonynyń qyzmetkerleri jelikken jas júrgizýshiniń jeke basyn anyqtap, oǵan Ákimshilik quqyq buzýshylyq týraly kodekstiń 505 jáne 593-baptary boıynsha hattama toltyrdy.
Mańǵystaý oblysy Polısııa departamentiniń bastyǵy Janarbek Baqtybaev sońǵy qońyraý merekesine baılanysty jeke quramnyń sol kúni kúsheıtilgen rejimde jumys istegenin málimdedi. Sol kúni qoǵamdyq tártipti saqtaýǵa 500-den astam qyzmetker jumyldyrylǵan. Aımaqtyń tártip saqshylary quqyq buzǵan kámeletke tolmaǵan jetkinshekter úshin de jaýapkershilik qarastyrylǵanyn eskertip, ata-analardy balalaryn qatań qadaǵalaýǵa shaqyrǵan edi.
Polısııa departamenti baspasóz qyzmetiniń habarlaýynsha, Mańǵystaý oblysy quqyq qorǵaý organdarynyń qyzmetkerleri oqý jylynyń aıaqtalýyna arnalǵan merekelik is-sharalardyń qaýipsizdigin arttyrý úshin qosymsha sharalardy qolǵa alǵan. 25 mamyrda óńirdiń bilim berý mekemeleriniń barlyǵynda saltanatty jıyndar ótti. Kúsheıtilgen jumys nátıjeleri boıynsha polısııa qyzmetkerleri Ákimshilik kodekstiń birneshe baby boıynsha kóptegen buzýshylyqtardy anyqtap otyr.
Sońǵy qońyraýdyń «saltanatyn qyzdyrǵan» taǵy bir top Almaty – Bishkek kúre jolynda anyqtaldy. Tórt kólikpen júıtkigen jastar jol erejesin birneshe ret óreskel buzǵany úshin jaýapqa tartylyp otyr. Kólikterdiń barlyǵy aıyp turaǵyna jetkizilip, jastary 17 men 22-lerdegi «toıshyl» toptyń is-áreketterine qatysty birden 15 ákimshilik hattama toltyrylǵan. Halyqaralyq mańyzdaǵy jolda memlekettik nómiri joq «temir tulparlarmen» oınaq salǵan jastardyń qatty jyldamdyqta kele jatqan kólik terezelerinen belýaryna deıin syrtqa shyǵyp alyp, alaýlatyp-jalaýlatyp júıtkigen beınejazbasy birden polısııa qyzmetkerleriniń nazaryna túsken. Jazbany jan-jaqty saraptaǵan tártip saqshylary jelik qýǵan jetkinshekterdiń barlyǵy sońǵy qońyraýdyń sońyn jyn-oınaqqa aınaldyryp jibergen Almaty oblysyna qarasty Jambyl aýdanynyń týmalary ekenin anyqtap otyr. Endi osy daraqylyqtary úshin dańǵoı jetkinshekterdiń ata-analary aıyppul tóleýge mindetti.