AQSh-tyń Los-Andjeles qalasynda ótken kásipqoı boks keshinde birinshi orta salmaqta kúsh synasyp júrgen 30 jastaǵy qazaqtyń uly Batyr Júkembaev óziniń sporttyq mansabynda alǵash ret jeńilistiń kermek dámin tatty, dep habarlaıdy Egemen.kz.
Batyr Júkembaevtyń buǵan deıingi kezdesýleriniń barlyǵyn Kanadada ótkizgeni belgili. Sol bes jyldan asa ýaqyt aralyǵynda ol biraz bedel jıyp ta úlgerdi. Qarsy kelgenderdi qoǵadaı japyryp, barsha jankúıerlerdiń qoshemetine bólendi. Anyqtap aıtsaq, 2016 jyldan beri 18 ret sharshy alańǵa kóterilgen qandasymyz barlyq qarsylastaryn tegisteı utyp,14 kezdesýdi merziminen buryn aıaqtady.
AQSh-taǵy alǵashqy jekpe-jegin Batyr Sabrıel Matıasqa qarsy ótkizdi. 29 jastaǵy Pýerto-Rıkonyń ókili 17 kezdesýiniń tek bireýinde ǵana utylǵan edi. Qalǵan 16 jekpe-jekte qarsylastaryn esinen tandyrdy. Mine, qazaq boksshysyna osyndaı myqtymen kúsh synasýyna týra keldi.
Los-Andjelestegi básekede Matıastyń ústemdigi anyq baıqaldy. Tórtinshi raýnda ol Júkembaevty eseńgiretip tastady. Odan keıin de Pýerto-Rıkonyń boksshysy qarqynyn esh báseńdetpedi. Al segizinshi raýndtan keıin Batyr jekpe-jekti jalǵastyrýdan bas tartty.