Qazaqstan Prezıdenti Dúnıejúzilik saýda uıymynyń Bas dırektory Ngozı Okondjo-Ivealamen vıdeo konferensııa formatynda kezdesý ótkizdi. Kelissóz barysynda Qazaqstan men Dúnıejúzilik saýda uıymy arasyndaǵy yqpaldastyqty nyǵaıtýdyń perspektıvalary qarastyryldy, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev Ngozı Okondjo-Ivealany jýyrda Dúnıejúzilik saýda uıymynyń Bas dırektory qyzmetine saılanýymen quttyqtap, atalǵan uıymmen aradaǵy tyǵyz yntymaqtastyq elimizdiń basymdyqtarynyń biri ekenin atap ótti.
Kezdesýde Qazaqstannyń tóraǵalyǵymen ótetin DSU-ǵa múshe elder mınıstrleriniń 12-shi konferensııasyna daıyndyq máselelerine erekshe nazar aýdaryldy.
– Biz úshin bıylǵy qarashanyń sońy jeltoqsannyń basynda ótetin DSU-ǵa múshe elder mınıstrleriniń 12-shi konferensııasyna tóraǵalyq etý úlken mártebe. Qazaqstan Úkimeti ortaq is-sharamyzdyń barlyq mazmundyq jáne uıymdastyrýshylyq máselelerine qatysty pysyqtaý jumystary boıynsha DSU Hatshylyǵymen tyǵyz yqpaldastyq ornatady, – dedi Memleket basshysy.
Prezıdenttiń aıtýynsha, Qazaqstan kópjaqty saýda júıesin belsendi jaqtaıtyn bolǵandyqtan, Konferensııanyń naqty nátıje ákelýine múddeli. Sondaı-aq kún tártibindegi barlyq sheshilmegen máselelerdi talqylaýǵa óz tarapynan konstrýktıvti túrde úles qosýǵa daıyn ekenin jetkizdi.
Memleket basshysy DSU Bas dırektoryna Qazaqstannyń koronavırýsqa qarsy kúreste qabyldap jatqan sharalary týraly málimet berdi. Taraptar pandemııaǵa qarsy kúresti, sonyń ishinde, vaksına men medısınalyq qural-jabdyqtarǵa jalpy qoljetimdilikti qamtamasyz etýge baǵyttalǵan jahandyq kúsh-jigerdi talqylady.
Qasym-Jomart Toqaev DSU basshysynyń jetekshiligi boıynsha Uıymǵa múshe eldermen, vaksına óndirýshi memlekettermen jáne qoljetimdi vaksınaǵa muqtaj eldermen júrgizilip jatqan syndarly dıalogty tolyq qoldaıtynyn aıtty.
– Dúnıejúzilik saýda uıymy qajetti medısınalyq taýarlardyń jetkizilýin jáne vaksınaǵa ádiletti qoljetimdilikti qamtamasyz etýde mańyzdy ról atqarýy tıis dep esepteımiz. Osyǵan baılanysty Úkimetke saýda jáne densaýlyq saqtaý salasyndaǵy bastamalarǵa qatysty elimizdiń ustanymyn, atap aıtqanda, mınıstrlerdiń 12-shi konferensııasyna qatysty tıisti sheshim ázirleýge qomaqty úles qosýdy tapsyrdym, – dedi Prezıdent.
О́z kezeginde, Ngozı Okondjo-Iveala Qazaqstannyń COVID-19 indetine qarsy kúrestegi kúsh-jigerin joǵary baǵalap, otandyq QazVac vaksınasynyń ázirlenýimen quttyqtady.
Dúnıejúzilik saýda uıymynyń basshysy alda bolatyn mınıstrlerdiń 12-shi konferensııasyna daıyndyq barysy týraly aıta kele, Prezıdentke atalǵan is-shara aıasynda ótetin bıznes-forýmdy uıymdastyrýǵa Qazaqstannyń qatysý múmkindigin qarastyrýdy usyndy. Sondaı-aq Qasym-Jomart Toqaevty Jenevada ótetin konferensııaǵa shaqyrdy.
Kezdesý sońynda Qasym-Jomart Toqaev Ngozı Okondjo-Ivealany ózine yńǵaıly ýaqytta Qazaqstanǵa saparmen kelýge shaqyrdy.