Qazaqstan Prezıdenti Qasym-Jomart Toqaev Dúnıejúzilik densaýlyq saqtaý assambleıasynyń 74-shi sessııasynyń jabylýynda vıdeo úndeý jasady, dep habarlaıdy Egemen.kz.
24 mamyr men 1 maýsym aralyǵynda ótip jatqan sharaǵa Dúnıejúzilik densaýlyq saqtaý uıymyna múshe 194 memlekettiń delegattary qatysyp jatyr. Sessııanyń negizgi taqyryby – «Qazirgi pandemııanyń aıaqtalýy jáne aldaǵy indetterdiń aldyn alý: tıimdi, qaýipsiz ári beıbit álemdi birlesip qurý».
Qasym-Jomart Toqaev Dúnıejúzilik densaýlyq saqtaý assambleıasynyń sessııasy búkil álem 1,5 jyldan beri koronavırýspen kúresip jatqan asa kúrdeli kezeńde ótip otyrǵanyna toqtaldy. Prezıdenttiń aıtýynsha, koronavırýs ulttyq densaýlyq saqtaý júıeleri men kópjaqty ınstıtýttar úshin teńdessiz synaq boldy.
«Ǵalamdyq daǵdarys kezinde Dúnıejúzilik densaýlyq saqtaý uıymy barlyq múshe memlekettermen belsendi qarym-qatynas jasady. Uıym óziniń biliktiligimen, bastamashyldyǵymen, mol tájirıbesimen damýshy jáne damyǵan elderdiń indetke qarsy kúresine basshylyq etti. Ol ǵalymdardyń ǵylymı jańalyqtar ashýyna uıytqy boldy. Sonymen qatar muqtaj jandar úshin qajetti resýrstardy jumyldyrýdy shuǵyl uıymdastyrdy», dedi Memleket basshysy.
Qasym-Jomart Toqaevtyń aıtýynsha, Assambleıanyń qazirgi qyzmeti jasampazdyq pen ujymdyq jaýapkershilikke negizdelgen bolashaq baǵyt-baǵdarymyzdy aıqyndaýǵa jaqsy múmkindik beredi.
Prezıdent keshegi men búginginiń aýyr synaqtarynan sabaq alyp, DDSU Bas dırektory Tedros Adhanom Gebreıesýstiń usynysyn tolyq qoldaıtynyn aıtty. Bul usynystar DDSU-ny reformalaýǵa jáne ony qýatty, tıimdi ári qarjylyq turǵydan derbes halyqaralyq deńgeıdegi uıym retinde transformasııalaýǵa baǵyttalǵan.
Memleket basshysy óz úndeýinde alǵashqy medısınalyq-sanıtarlyq kómektiń mańyzdylyǵyna, atap aıtqanda, 2018 jylǵy Astana deklarasııasyn ilgeriletýge nazar aýdardy.
Prezıdenttiń pikirinshe, pandemııa alǵashqy medısınalyq-sanıtarlyq kómektiń kez kelgen juqpaly aýrýǵa tıimdi tótep beretin negizgi tetik bola alatynyn aıqyn kórsetip berdi. Osy rette Memleket basshysy DDSU-men birlesip uıymnyń Almaty qalasyndaǵy Alǵashqy medısınalyq-sanıtarlyq kómek jónindegi aımaqtyq bıýrosyn kúsheıtýge nıetti ekenin jetkizdi.
Sóz sońynda Qasym-Jomart Toqaev Qazaqstannyń DDSU maqsattary men qaǵıdattaryn sózsiz qoldaıtynyn taǵy bir márte naqtylady.