COVID-19 qaýipti indeti boıynsha bir jarym aıdan astam ýaqyt boıy «qyzyl aımaqta» qalyp otyrǵan oblystyń epıdemııalyq jaǵdaıy áli de alańdatarlyq. Sońǵy derekterge qaraǵanda, kún saıyn 120-dan astam jańa jaǵdaı tirkelip otyr.
Pandemııa bastalǵannan beri oblysta COVID-19-dan 21 863 jaǵdaı tirkelse, onyń 15 505-inde aýrý belgileri bar, 6 358-i sımptomsyz bolǵanymen vırýsty tasymaldaýshylar. 109 adam osy indetten kóz jumǵan. Sáýirmen salystyrǵanda mamyr aıynda qaýipti indet 13,6 paıyzǵa ósti. Indetten kósh bastap turǵan Býrabaı aýdanynda – 564, Atbasarda – 328, Aqkólde 290 jaǵdaı anyqtalyp, syrqattar sany bir aıdyń ishinde birneshe esege óskeni belgili bolyp otyr. «Sary aımaqtaǵy» Shortandy men Ereımentaý aýdandaryn qospaǵanda, basqa aýdandardyń barlyǵy derlik koronavırýstyń taralýy turǵysynan «qyzyl aımaqta». Qorǵaljyn, Zerendi jáne Birjan sal aýdandary men Stepnogor qalasy ǵana «jasyl aımaqta».
Degenmen, bıylǵy jazda balalar saýyqtyrý lagerlerinde byltyrǵydaı emes, dem alýǵa múmkindik týady dep kútilýde. Biraq epıdemııalyq jaǵdaıdy eskere otyryp, balalardyń densaýlyǵyn qorǵaý uıymdarynyń jumysyna birqatar shekteý engiziledi. Mektepke deıingi bilim berý ortalyǵynyń qyzmeti «qyzyl aımaqta» balalar sany 30 paıyzdan aspaǵan jaǵdaıda, «sary aımaqta» 50 paıyzdan aspaıtyn jaǵdaıda ruqsat etiledi. Sonymen qatar balalar saýyqtyrý mekemelerine kelgen kezde ár balanyń densaýlyǵy týraly qujattary, juqpaly aýrýlarmen, onyń ishinde koronavırýs belgileri joq ekendigi týraly anyqtamasy, 72 saǵat buryn júrgizilgen COVID-19 zerthanalyq reaksııasy teris degen qujat bolýy shart. Barlyq balalar lagerge bir mezgilde kelip, ketýi tıis. Kelgen balalardy qabyldaý kúninen keıin syrttan kelgen adamdarmen baılanysýǵa nemese aýysym kezinde ýaqytsha ketýge tyıym salynady.
Derttiń dendep ketýine ózimiz de kinálimiz. Qansha aıtylǵanymen, saqtyq sharalary saqtala bermeıtin jıyndar tyıylmaı otyr. Jyl basynan beri júrgizilgen monıtorıngke sáıkes, 18 440 nysannyń 345-inde karantındik is-sharalardy buzý oqıǵalary anyqtalyp, 401-ine ákimshilik aıyppul salynǵan. Mamyr aıynda ǵana 2 801 nysan tekserilip, karantındik sharalardy buzýdyń 57 faktisi anyqtalǵan. Tártip buzǵandarǵa 45 márte ákimshilik aıyppul salynǵan. Kókshetaýda ASHYQ jobasy iske qosylyp, oǵan qatysatyn obektiler úshin jeńildikter qarastyrylǵan. Mysaly, tamaqtaný obektileriniń jumys rejimi jalpy, 20 saǵatqa deıin, al ASHYQ jobasyna qatysqandar túngi 2 saǵatqa deıin jumys isteı alady. Banket zaldarynyń qyzmetine tyıym salynady, tek eske alý sharalaryn ótkizýge ruqsat etiledi.
ASHYQ jobasyna qatysatyn fıtnes ortalyqtar, sport zaldary men sporttyq-saýyqtyrý ortalyqtary, basseınderdiń jumysy týraly aıtatyn bolsaq, senbi men jeksenbi kúnderi belgilengen saqtyq sharalaryna saı jumys isteı alady. Mádenı nysandar jobaǵa qatyssa ǵana jumys isteýge ruqsat etiledi.
Qazir ASHYQ jobasyna tirkelip, jumys istegisi keletin kásipkerler qatary birshama kóbeıip keledi. Búginde 285 ótinish kelip tússe, onyń 215-i QR kodtaryn resmı engizgen. Sol arqyly «qyzyl» jáne «sary» mártebesi bar 12 kelýshi anyqtalyp, onyń 4-eýinde PTR testiniń oń nátıjesi jáne 8-i qaýipti indetti tasymaldaýshylar ekeni anyqtalǵan. Máselen, Kókshetaýdaǵy FamilyMood IPARTMOOD meıramhanasy men «Mıasorýbka» nysandary sııaqty qoǵamdyq tamaqtaný oryndarynda «qyzyl» mártebedegi 2 kelýshi anyqtalǵan. Sol sııaqty qoǵamdyq tamaqtaný oryndarynda taǵy 5 kelýshi «sary» mártebemen júrgeni belgili bolǵan. Shýchınsk qalasyndaǵy «Iаgýar» fıtnes-ortalyǵyna taǵy eki kelýshi «qyzyl» jáne «sary» mártebemen júrgeni anyqtalǵan.
Halyq saqtyq sharalaryn barynsha kúsheıtpese, daýasyz derttiń tamyryna balta shabý, aldyn alý óte qıyn. Kópke belgili osy bir jaıtty taǵy bir qaıtalap aıtsaq, artyqtyǵy bolmas.