Batys Qazaqstan oblysynda jeńil avtokólik jylqyǵa soǵylyp, eki eresek adam men bala qaıtys boldy, dep habarlaıdy Egemen.kz.
Qaıǵyly oǵıǵa 16 mamyr kúni saǵat 23:00-de Oral-Atyraý tas jolynyń 75 shaqyrymynda bolǵan. Oblystyq Polısııa departamenti baspasóz qyzmetiniń málimetinshe, VAZ-21113 avtokóligi eki jylqymen soqtyǵysty. Apat saldarynan jeńil avtokóliktiń 54 jastaǵy júrgizýshisi, onyń 85 jastaǵy ákesi men 13 jastaǵy balasy alǵan jaraqattarynan oqıǵa ornynda kóz jumdy.
Qazirgi tańda jol faktisi boıynsha polıseıler QR QK 345-baby «Jol qozǵalysy erejelerin buzý» boıynsha sotqa deıingi tergeýdi bastady.
«Túngi ýaqytta, ásirese, qaraýsyz qalǵan maldarǵa qatysty keleńsiz jaıttar azaımaı otyr. Osyǵan baılanysty mal jaıý erejelerin buzǵany úshin 916 mal ıesi ákimshilik jaýapkershilikke tartyldy. Osy sekildi jaıttardyń aldyn alý maqsatynda «Elektrondy baqtashy» júıesi qolǵa alyndy. Sol arqyly olardyń ornalasqan jerin anyqtaýǵa bolady. Alaıda kóbine-kóp mal ıeleri atalǵan mindettemerdi oryndamaı, aıyppul tólep jatady», deıdi oblystyq PD basshysynyń orynbasary Janbolat Janshın.
Eske sala keteıik, bıyl Aqjaıyq aýdanynyń mańynda 17 jol kólik oqıǵasy bolyp, 20 adam qaıtys bolǵan edi. Olardyń 40-y túrli dárejedegi jaraqat alyp, aýrýhanaǵa jetkizilgen edi.
Buǵan deıin oblys ákimi Ǵalı Esqalıev aýdan ákimderine úı janýarlarynyń qatysýymen bolatyn JKO-ǵa jol bermeý boıynsha sharalar qabyldaý qajettigi týraly eskertken-di.
«Respýblıkalyq trassalardyń boıynda ornalasqan aýdan ákimderine úı janýarlarynyń qatysýymen bolatyn JKO-ǵa jol bermeý jóninde sharalar qabyldaý qajettigi týraly eskertken edim. Bul aýdan ákimderiniń tikeleı mindeti, osyǵan baılanysty Aqjaıyq aýdanynyń ákimine sógis jarııalaımyn. Eki aıdan keıin taǵy qarastyramyz. Sondaı-aq veterınarııa basqarmasynyń jumysy nashar ekenin atap ótkim keledi. 2020 jyly maldyń qatysýymen bolǵan 49 apattyń 43-inde mal ıeleri anyqtalmaǵan. Veterınarııa basqarmasynyń basshysyna qatysty qyzmettik tergeý júrgiziletin bolady», dep málimdedi Ǵalı Esqalıev.
Aıta keteıik, resmı derekterge sáıkes bıyl oblys joldarynda 99 apat bolyp, 43 adam kóz jumdy. Taǵy 157 adam túrli dárejedegi jaraqat aldy. 99 apattyń eki jaǵdaıynda jol-kólik oqıǵasynyń sebepteri úı janýarlary bolǵan. Tórt adam qaza taýyp, taǵy ekeýi jaraqat aldy.