Sport jáne dene shynyqtyrý isteri komıtetiniń tóraǵasy Serik Sápıev ótken apta qazaqstandyq sportshylar úshin tabysty bolǵanyn aıtty, dep habarlaıdy Egemen.kz OKQ-ǵa silteme jasap.
«Bokstan Azııa chempıonatynda jalpykomandalyq esepte birinshi oryn ıelendik. Áıelder quramasy 8 altyn medal jeńip aldy. Erler quramasy, ókinishke qaraı, nátıje boıynsha sátti óner kórsetken joq, alaıda sheberlikterin baıqatty. «Roland Garros» týrnırinde tennısshilerimiz qýantty. Elena Rybakına Qazaqstan tarıhynda alǵash ret álemniń burynǵy birinshi raketkasy Serena Ýılıamsty jeńdi. Andreı Golýbev pen Aleksandr Býblık týrnırdiń shırek fınalyna shyqty. Hokkeı quramasyna álem chempıonatynyń pleı-offqa shyǵý úshin bir ǵana qadam jetpedi, biraq bul da úlken jetistik. Ǵusman Qyrǵyzbaev álem chempıonatynda kúmis medal ıelendi», dedi spıker barlyǵyn jeńisterimen quttyqtaı otyryp.
Aıta keteıik, búgin Ortalyq kommýnıkasııalar qyzmetinde ótken brıfıngke qatysýshylar halyqaralyq grossmeıster ataǵy bar Jansaıa Ábdimálikti de jaqyndaǵy jeńisimen quttyqtady.