О́ńirdegi ıgilikti istiń biri – «Jaqsylyq sóresi» jobasy. Izgi nıetpen bastalǵan joba barysynda aıtarlyqtaı sharýa tyndyrylýda. Eń bastysy, adamgershilikke tunyp turǵan ónegeli is órisin jaıyp keledi. El qamyn jeıtin, qysylǵan adamdardy qoltyǵynan demeıtin jomart jandar az emes eken.
Býrabaı aýdanynda eriktiler qozǵalysyna jetekshilik etetin Olesıa Baımova dál osyndaı bastamany qolǵa alǵan bolatyn. Jastar birden jumyla ketti. Bir-birinen qulaqtanyp, aýdandaǵy kásipkerler, ásirese azyq-túlik dúkenderiniń ıeleri bul bir qysyltaıańda qajet qadam eken desip, qolushyn sozýda. Ánsheıinde bolar-bolmas dúnıe kórinetin az ǵana kómek kisi kóńilin demep, janyn jadyratady. Baǵaly bastamanyń kómegin áleýmettik jaǵynan az qamtamasyz etilgen otbasylary men jalǵyzilikti jandar kórip otyr. Olarǵa qaıyrymdylyq esebinde berilgen azyq-túlik emes, zamandastarynyń janashyrlyq nıeti qymbat. Qazir aýdandaǵy 11 azyq-túlik dúkeninde qaıyrymdylyq sóresi bar. Adamdar tańerteń osy dúkenderge soǵyp, áldekimge qajet bolady-aý degen azyq-túlikti óz qarajatyna satyp alyp, jaqsylyq sóresine qoıyp ketedi. Bári bir-birimen ýádelesip qoıǵandaı aty-jónderin atamaýdy ótinedi. Shynynda da jaqsylyq jasaǵan adamnyń jarnamaǵa úıir emes ekeni belgili. Osy jerden muqtaj adamdar ózderine kerek taýarlaryn tegin alyp ketip jatyr. Árıne, qaıyrymdy jandarǵa aq alǵystaryn da joldaıdy. Munyń arǵy jaǵynda bir-birine degen izetti kóńil, izgilikti peıil jatyr. Aınalyp kelgende qoǵam jaqsylyq dińgeginiń tóńireginde toptasyp, birlik bekem bola túsedi.
Jekelegen adamdarǵa da qaıyrymdylyq kórsetý keń óris alýda. О́tken apta ishinde uzyn-yrǵasy 90-ǵa jýyq jalǵyzilikti adamǵa qarjylaı kómek kórsetilipti. Aýdannyń isker azamattary eriktilerdiń ótinishterin muqııat tyńdap, qolushyn berýge quba-qup. Taǵdyr tálkegine ushyraǵan, aýyr syrqatqa dýshar bolǵan adamdar da atymtaı jomarttardyń jaqsylyǵyn kórip, úmit otyn laýlata túsýde. Osy arada bir mysal keltire ketelik, Kámesh Qamaljan esimdi syrqatqa kómek kórsetý barysynda eriktiler 4,2 mln teńge jınap, jan jylýyna bólegen. Dál osyndaı mysaldy irgedegi Bulandy aýdanynan da keziktirdik. Aýdannyń jomart jandary Ilıa Chernyshovtyń emdelýine 1,3 mln teńge qarajat jınap beripti. Atpal azamattar ǵana emes, zeınetkerlerdiń de osy bir ıgilikti iske úles qosqanyn estigende, kóńiliń búrlep ketedi.
Jaqsylyq jarysy aýdan ortalyqtarynda ǵana emes, aýyldyq jerlerde de jıilegen. Aıtalyq, Aqkól aýdanyna qarasty Novorybınsk aýyldyq okrýginde kópbalaly, áleýmettik jaǵynan az qamtylǵan otbasylar men jalǵyzilikti adamdarǵa azyq-túlik sebeti taratylǵan. Bul jumysqa negizinen oblystyq «Qyzyl Jarty Aı» qoǵamynyń fılıaly muryndyq bolǵan eken. Nátıjesinde, qanshama otbasy qamqor kóńildiń izetti járdemine kóńil toǵaıtyp qaldy. Olar úshin eń bastysy, kóńil edi. О́zderiniń keshegi karantın kúnderi qıyndyqpen jalǵyz alyspaı, kóppen kórgen synaq ekenin jete túsinip otyr.
– Dám-tuzdaryna rahmet, – deıdi aýyl turǵyny Valentına Baıbatyrova. – As-sýymyz jetkilikti. Biz úshin baǵalysy – eldiń izgi tilegi. Áıteýir sanatta bolǵanymyzǵa qýandyq emes pe?!
Osy aýdannyń Jalǵyzqaraǵaı aýyldyq okrýginiń jastary da el ishindegi egde adamdardyń amandyqtaryn bilip, ádeıilep izdep baryp sálem berip, hal-ahýaldaryn bilgen. Izinen jaqsylyq ilese keletin qaıyrymdylyǵy mol jastardyń qareketine aǵa býyn ábden razy bolyp, alǵystaryn aıtyp, batalaryn beripti. Jastar bolsa qur qol barmaı, azyq-túlik sebetin ala barǵan. Sóıtip eki býynnyń arasyndaǵy adamgershilikke negizdelgen syılastyqtyń altyn arqaýy barynsha bekı túsken.
El ishindegi baýyrmaldyq artqan saıyn adamdardyń boıyndaǵy bolashaqqa degen senim de nyǵaıa túspek. Sonyń bir parasy eriktilerdiń qolymen, qolymen ǵana emes, aq kóńil, adal nıetimen jasalyp jatyr.
Aqmola oblysy