Kún saıyn Qazir Petropavlda keıbir kópqabatty úılerdiń aýlasyna kiretin jerlerge qaqpa ornatyp, jaýyp tastaý nemese kólik ótýge bolmaıtyn aýyr tastar qoıý úrdisi údep ketken. Keıbir páter ıeleri kooperatıvteriniń basshylary aýlalaryn taza ustaýdy syltaýratyp, kóliktiń ǵana emes, jurttyń kirip-shyǵýyn da qıyndatyp jibergen. Munyń ózi oqys oqıǵa kezinde aýlaǵa tótenshe qyzmet kólikteriniń enýine qolaısyzdyq týdyrady.
Adamy aýrýdan qysylyp jatqan úıge jedel járdem mashınalary jaqyndaı almaı, kóshege toqtap, syrqat jandy jaıaý alyp shyǵýǵa májbúr. Al órt shyqqan osyndaı úılerge jaqyndaı almaý zardap shegýshi adamdardyń qasiretin arttyra túsedi. О́ıtkeni árbir mınýt sanaýly sátte órt sóndirýshiler jan-jaǵyn túgel qorshap tastaǵan úıdiń qaqpalaryn buzyp ashýǵa álektenip, ýaqyttaryn joǵaltady.
Osyndaı oqıǵanyń biri jýyrda boldy. Qala ortasyndaǵy P.Vasılev kóshesindegi 7 páterli úsh qabatty, turǵyndary jan-jaǵyn túgel qorshap alǵan elıtalyq úıde órt shyqqanda sóndirýshiler jumys isteı almaı kóp qınaldy. Áıteýir, jas jigitter bıik aýlanyń ishine sekirip túsip, sý atatyn shlangini ótkize aldy.
«Birinshi qabattan úshinshi qabatqa deıingi jalynǵa oranǵan balkondarǵa biz kire almaı júrgende kúsheıip alǵan ottyń qyzýy jaqyndatpaǵan soń tómennen sóndire almaı, úıdiń tóbesine shyǵyp óshirýge týra keldi. О́rt sóndirý barysynda 12 adamdy evakýasııalap, 2 adamdy órtten alyp shyqtyq. Áıteýir, qaza bolǵandar men zardap shekkender joq. Tek páterlerdiń terrasasy men barlyq 3 qabattaǵy balkondar joıylyp, páterlerdiń plastıkalyq konstrýksııalary zaqymdaldy», dedi oblystyń Tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Oral Ábdirahmanov.
Sońǵy kezde jıilep ketken órt oqıǵalary osyndaı kedergilerdi joıýǵa májbúr etip otyr. Jýyrda «Arnaıy kólikke – jasyl jaryq!» is-sharasy qolǵa alyndy. Onyń aıasynda Petropavl qalasy TJ basqarmasynyń jeke quramy men Soltústik Qazaqstan oblystyq TJ departamentiniń О́rt sóndirý jáne avarııalyq-qutqarý jumystary qyzmeti birlesip, oblys ortalyǵynyń aýlalarynda reıd ótkizdi. Onyń maqsaty – turǵyndary qaýipsizdik erejeleriniń talaptaryna nemquraıdy qaraıtyn aýlalardy anyqtaý, aýlalarǵa kireberisterge qoıylǵan temirbeton bloktar men qorshaýlardy joıý. Tótenshe oqıǵa ornyna shuǵyl keletin, qajetti kómek kórsetetin, adam ómirin qutqaratyn órt sóndirýshiler men jedel járdemniń jáne t.b. arnaıy kólikterdiń ótý joldaryn bosatý. Reıd nátıjesinde Nazarbaev, Bolatbaev, Hımenko, Ýálıhanov jáne Shýhov kóshelerindegi kóp qabatty úılerdiń aýlalarynan 8 beton blok pen 11 metall qorshaý alyndy. Joly kedergilerge toly basqa kóshelerdegi úılerdiń turǵyndarymen jınalystar ótkizilip, jadynamalar taratyldy.
Jazdyń ystyq kúnderiniń jurtty ábigerge salǵan taǵy bir qasireti – sýǵa batýshylardyń jıileýi. TJ departamentiniń bastyǵy, azamattyq qorǵaý polkovnıgi Ramıl Kamalovtyń aıtýyna qaraǵanda, oblys aýmaǵynda 12 kól men Esil ózeniniń jaǵasynda ornalasqan 58 jaǵajaıda ǵana shomylýǵa ruqsat etilgen. Qalǵandarynda shomylǵan adamdar tártip buzýshylar bolyp sanalady. Biraq oǵan qarap jatqan eshkim joq. Mamyrdyń mı qaınatar ystyǵy adamdardy eń jaqyn sý qoımalaryna qýyp tyqty. Sońǵy 7 jylda oblys boıynsha 180 adam sýǵa ketken, onyń ishinde 24 bala bar. Al byltyr 9 adam sýǵa batqan edi, onyń bireýi bala.
TJ departamenti bastyǵynyń orynbasary, maıor Murat Qanǵojınov: «Búgingi kúni shomylý jáne balyq aýlaý oryndary boıynsha 34 patrýldeý júrgizildi, 1300-den astam jadynama men broshıýra taratyldy, áńgimeler men dárister ótkizildi», dedi. Sondaı-aq ol sýda árqashan da saq bolyp, jabdyqtalmaǵan ýchaskelerde, mas kúıinde, túngi ýaqytta shomylýdyń, balalardy sý qoımalarynyń janynda qaraýsyz qaldyrý qaýipti ekenin aıtty.
Soltústik Qazaqstan oblysy