Taldyqorǵanda 150-den astam desantshy D-6 jáne «Búrkit» parashıýtterin paıdalana otyryp, túnde sekirdi, dep habarlaıdy Egemen.kz Qorǵanys mınıstrligine silteme jasap.
Túnde parashıýtpen sekirý – desantshylardyń jaýyngerlik daıarlyǵynyń mindetti elementi. Bul jattyǵýlardy kelisimshart boıynsha ofıserler men áskerı qyzmetshiler oryndaıdy.
– Sekirýge ruqsat berilgen barlyq áskerı qyzmetshiler parashıýtti jınaý tártibin egjeı-tegjeıli zerdelep, aldyn ala daıyndyqtan jáne arnaıy áýe-desant kesheninde oqytýdan ótti. Áýede jáne jerge qoný kezinde is-qımyldardy pysyqtady, – dedi desanttyq-shabýyldaý brıgadasy komandıriniń áýe-desant daıarlyǵy jónindegi orynbasary podpolkovnık Arkadıı Býrmıch.
Túnde parashıýtpen sekirý kúndizgi ýaqytqa qaraǵanda qıyn. Olardy oryndaý desantshynyń is-qımyly qyraǵylyq pen naqtylyqty qajet etedi. Qarańǵyda áýeni baǵdarlaý qıyndaıdy. Sondyqtan túngi sekirýdiń daıyndyq baǵdarlamasyna qoný kezindegi arnaıy daǵdylardy damytý sabaqtary kiredi.
Parashıýtshi tómendegen kezde tek sekirý alańynyń jaryq belgilerine ǵana emes, sonymen qatar jaqyn jerdegi jaryqtandyrylǵan joldar men ózenderdiń shaǵylysýyna, basqa da baǵdarlarǵa súıený kerek.
– Túngi sekirýge daıyndyq kezinde biz qonýǵa erekshe nazar aýdaramyz. Eger kúndizgi ýaqytta desantqa jerge qoný sátin naqtylaý ońaı bolsa, bul qıynshylyq týdyrmaıdy. Al túnde qoný kezinde araqashyqtyq pen ýaqytty anyqtaý qıyn. Sondyqtan qarańǵyda sekirgen desantshy kenetten jerge soqqymen túsýge daıyn bolýy kerek, – deıdi podpolkovnık Arkadıı Býrmıch.
Túngi ýaqytta parashıýtpen sekirý – bul áýe-desanttyq daıarlyqtyń eń qıyn, ári jaýapty kezeńderiniń biri. Onyń sátti oryndalýy tek batyldyq pen erik-jigerdi ǵana emes, sonymen qatar erejelerdi, jınaqylyq pen belgili bir sheberlikti qatań saqtaýdy talap etedi.
Jattyǵýlar kúndizgi ýaqytta zerdelenip, túngi sekirýler aldynda qaıta pysyqtalǵanda jáne ár desantshy daıyndyqty barynsha meńgergende áýedegi is-qımyldar sátti oryndalady.