Dıdar Smaǵulov Ulttyq testileý ortalyǵy baqylaý keńesiniń tóraǵasy bolyp taǵaıyndaldy. Bul týraly Bilim jáne ǵylym mınıstri Ashat Aımaǵambetov Facebook paraqshasynda jazdy, dep habarlaıdy Egemen.kz.
«Dıdar Smaǵulovqa eki jyl boıy Ulttyq testileý ortalyǵynyń basshysy bolyp qyzmet atqarǵany úshin alǵysymdy bildiremin. Bul taǵaıyndaý meniń alǵashqy kadrlyq sheshimim boldy. Dıdar Nurkenuly aldyna qoıylǵan mindetterdi nátıjeli ári tıimdi oryndady. Endigi kezekte Dıdar Smaǵulov shtattan tys keńesshim jáne UTO baqylaý keńesiniń tóraǵasy bolyp jumys isteıtin bolady», dep jazdy vedomstvo basshysy.
Eske salsaq, mamyr aıynyń sońynda Dıdar Smaǵulov Ulttyq testileý ortalyǵynyń dırektory qyzmetinen ketkenin málimdegen edi.