Qazir bilim salasyna, orta mektep basshysyna qoıylatyn talap burynǵydan múldem bólek. О́zi jetekshilik jasap otyrǵan ujymdy jańartylǵan bilim berý ustanymdaryna beıimdep, jańalyq engize almaǵan basshy kóshke ilese almaı qalady. Eń bastysy, áriptesterine de, bilim alyp jatqan oqýshylarǵa da kesirin tıgizedi.
Bul rette Qyzylordadaǵy bilim berý uıymdaryn basqaratyn dırektorlar arasynda jaqsy úrdis qolǵa alynǵanyn aıta ketýimiz kerek. Respýblıkada alǵash bolyp Syr óńirinde «Seriktes dırektorlar» lıgasy qurylyp, mektepterdiń jobalyq baǵyttary aıqyndaldy. Qurylǵanyna jyl tolǵan lıgadaǵy mektepterge 20-dan asa taqyryptyq baǵyt berilip, soǵan sáıkes ár bilim uıasy jańa jobalar engizdi. Uıymdastyrýshylardyń aıtýynsha, bul tájirıbe ári qaraı ózge mektepterge taratyla beredi.
Búginde oblys ortalyǵyndaǵy №3 IT-lıseı «Baǵdarlamalaý mektebi» atanyp, bilim uıasynda Diqital school studio stýdııasy men IT-jýrnalıstıka úıirmesi jumysyn bastap ketti. Qaladaǵy №101 mektep ekologııalyq jobalardy júrgizetin «Jasyl mektep» mártebesin aldy. Al №261 mektep «О́zin-ózi basqarý» júıesin damytatyn tirek bilim oshaqtary qataryna enip otyr. Munan bólek, №176 mektep «Oqýǵa qushtar», №140 mektep «Ǵylymı jobalarǵa baǵyttalǵan» ujym retinde jumys júrgizýde. Al kelesi oqý jylynda №278 mektep oqýshylar úshin bıznes tásilderin úıretetin «Kásipkerlik mektebi» atanbaq.
Oblystyq bilim basqarmasynyń basshysy Aqzıra Qasymovanyń aıtýynsha, lıgany qurýdaǵy basty maqsat – dırektorlar arasynda shynaıy báseke qalyptastyryp, basshylardyń kommýnıkalyq jáne menedjmenttik qasıetterin damytý jáne jańa jobalarmen jumys júrgizýine múmkindik berý bolyp otyr.
– Qazirgi zaman talaby dırektorlardyń kabınettik basqarý júıesinen alystaıtyn ýaqyty jetkenin kórsetip otyr. Dırektordyń basqarýshylyq qabileti óz mektebindegi muǵalimmen qarym-qatynas ornatýynan kórinedi. Sonymen qatar bilim uıasyn basqarǵan basshy jumysyn baǵalaýda oqýshylarmen, ata-analarmen jumysty jolǵa qoıýy sekildi ólshemshart enip otyr. Olardyń jumysy jańa bilimdi ıgerý, pedagogterdi tıimdi basqarý men ata-analardyń tilin tabý sekildi mańyzdy qasıetter arqyly baǵalanady. Osy arqyly biz birinshi kezekte mazmun men sapany talap etemiz. Bilim berý standartyn meńgertý úshin dırektordyń jan-jaqty jumysty úılestirýine múmkindik jasaımyz. Lıgany ashýdaǵy maqsatymyz da ózara báseke qalyptastyrý arqyly basqarýshylyq baǵyttaǵy kózqarasty jańa zamanǵa saı beıimdeý, – deıdi basqarma basshysy.
Jyl ishinde «Seriktes dırektorlar» lıgasy músheleri TEDx alańynda kezdesip, jańa keıster boıynsha bilimderin jetildirdi. Dırektorlar «Strategııalyq brend menedjment», «Mekteptegi venchýrdi damytý», «Muǵalim arasyndaǵy matrısalar men anyqtaýyshtar», «Mekteptegi HR menedjment» engizýdiń jańa ádisterin úırendi.
Bir jylǵa jýyq ýaqyt ishinde «Seriktes dırektorlar» lıgasy ádistemelik marafon, «Altyn belgi» úmitkerlerine arnalǵan forým, oqýshylar arasyndaǵy debat, «PedEXPO-2021, taza tabıǵat aıasyndaǵy «Mekteptegi benchmarkıng» sharalaryn uıymdastyryp, úzdik 30 kitapqa 30 beınerolık túsirgen.
Lıgadaǵy dırektorlar bıyl óńirde tuńǵysh ret ótken sammıtte bas qosyp, oqý jylyn qorytyndylady. «re-Start: Jańa álemdegi jańa men» ataýynda ótken dırektorlar sammıtinde bilim berý uıymynyń basshylary ózekti máselelerdi pikir almasý formatynda talqylady. Qyzyqty taqyryp aıasynda oı bólisti. Máselen, Qyzylorda qalasyndaǵy №176 mektep dırektory Qadyrkúl Shaımaǵanbetova «Dırektordyń 10 qateligi» taqyrybyn arqaý etip alyp, áriptesterine saýal qoıdy. Al №3 IT-lıseı dırektory Lázzat Ábenova «Dırektordyń ózindik damýyndaǵy jyldyq jospar modýli» taqyrybyn tarqatty. Jeke jáne jyldyq jospardy qurýdyń joldary jaıly tájirıbesin aıtty. Sondaı-aq №43 mektep dırektory Baqytjan Imanberdıeva «Kóshbasshydaǵy emosııalyq ıntellekt» baǵytynda oı órbitti. Arnaıy beınesıýjet arqyly dırektorlarǵa tyǵyryqtan shyǵar joldy nusqap, tosynnan suraqtar qoıdy. Al óńirdegi bilim oshaǵynyń eń jas basshysy sanalatyn Jańaqorǵandaǵy №164 mektep dırektory Janbolat Ahmetjanov «Pedagogpen dıalog» taqyrybynda qyzý pikirtalas uıymdastyrdy.
Oı alańyndaǵy talqylaýda barlyq dırektor ózindik pikirin aıtyp, kózqarastaryn bildirdi. Ishki saraptaý, synı oılaý syndy máseleler de qamtyldy. Lıga jyl ishinde 30-ǵa jýyq mektep dırektorynyń basyn biriktirip otyr. Jańa oqý jylynda olardyń qatary jańa múshelermen tolyqpaq.
Qyzylorda oblysy