Almaty fontanynda toq soqqan balalardy qutqarǵan Sátbaev atyndaǵy Qazaq ulttyq tehnıkalyq zertteý ýnıversıtetiniń 2-kýrs stýdenti Abylaı Balapanov QR Tótenshe jaǵdaılar mınıstri Iýrıı Ilınniń buıryǵymen «Tótenshe jaǵdaıdaǵy erligi úshin» tósbelgisimen marapattaldy, dep habarlaıdy Egemen.kz.
Marapatty QR Tótenshe jaǵdaılar birinshi vıse-mınıstri Ibragım Kúlshimbaev tabystady.
«Tótenshe jaǵdaılar mınıstriniń atynan sizge belsendi azamattyq ustanymyńyz úshin rızashylyǵymdy bildiremin! Siz – búgingi kúnniń batyry ataǵyna laıyqtysyz. Syn saǵatta ekiniń biri siz sııaqty adam ómirin saqtaýmen qatar, óz ómirin qaýipke tigip, jedel sheshim qabyldaı almaıtyn edi», dedi birinshi vıse-mınıstr.
Eske sala keteıik, Almatyda 19 maýsym kúni Abylaı sý burqaqtyń janyndaǵy oryndyqta kitap oqyp otyrǵan bolatyn. Aıǵaı-shý men kómek suraǵan daýystardy estigen jas jigit fontan ishinde toq uryp jatqan adamdardy kórdi. О́z ómiri men densaýlyǵyna qaýip tóngenine qaramastan, Abylaı esh oılanbastan adamdardy qutqarýǵa kirisken.
Onyń aıtýynsha, eki adamdy qutqarý kezinde ózin de elektr toǵy qatty soqqan. Stýdent óz-ózine kelip esin jıǵansha, sol mańda kezdeısoq bolǵan 40-45 jastaǵy belgisiz er adam taǵy bir qyzdy qutqaryp qalǵan. Sýburqaqta oryn alǵan oqys jaǵdaıda zardap shekkenderge reanımasııalyq sharalar jasaý úshin (júrekke janama massaj jáne jasandy tynys alý) oqıǵa ornynda bolǵan qalanyń janashyr turǵyndary da atsalysyp, kómek bergen.
Abylaı Balapanov pen aty-jóni belgisiz er adamnyń, sondaı-aq oqıǵa ornynda bolǵan qaıyrymdy jandardyń batyl áreketiniń arqasynda úsh adamnyń ómiri qutqaryldy.