Búgin Almatyda «Qazaqstan» teleradıokorporasııasynyń Jáńgir han týraly «Saraı syry» tarıhı telehıkaıasynyń túsirilimi bastaldy, dep habarlaıdy Egemen.kz.
QR Aqparat jáne qoǵamdyq damý mınıstri Aıda Balaeva túsirilim alańynda shyǵarmashylyq toppen kezdesti. Mınıstr kınoónerdiń, onyń ishinde tarıhı týyndylardyń eń basty maqsaty – sanany jańǵyrtý ekenin atap ótti.
«Táýelsizdiktiń 30 jyldyǵy belesinde, egemen eldiń kózqarasymen ótken tarıhymyzdy qaıta túgendep, ásirese óskeleń urpaqqa ult tulǵalaryn tereń tanystyryp otyrýdyń mańyzy zor. Kileń talantty óner maıtalmandarynyń qatysýymen túsiriletin telehıkaıa bıik talǵamdy kórermen qaýymnyń kóńilinen shyǵyp, qoǵam tarapynan zor yqylasqa ıe bolady dep senemin», dedi A.Balaeva.
Telehıkaıada Jáńgir han rólin Medǵat О́mirálıev, Fatıma rólin Ámına Mektepbaeva, Isataı batyr rólin Nurlan Saǵynaev, Mahambet О́temisulynyń beınesin Darhan Súleımenov somdaıdy. Jobanyń kórkemdik jetekshisi – Arman Sqabyluly, qoıýshy-rejısseri - Baqyttas Sanıtas, prodıýseri – Shyńǵys Armanuly.
«Saraı syry» - Korporasııa bıyl túsiretin tarıhı serıaldardyń ishindegi eń kópbólimdisi. Basty keıipkerlerdi tańdaýda úlken talqylaýlar ótkizildi. Akterlerdiń bári kórermenge iri tarıhı obrazdar arqyly jaqsy tanys bolǵandyqtan osyndaı tańdaý jasadyq. Bul otandyq telenaryqta Jáńgir han tulǵasyna arnalyp otyrǵan alǵashqy telehıkaıa bolǵandyqtan, artylyp otyrǵan jaýapkershilik zor», dedi Basqarma tóraıymy Lázzat Tanysbaı.
12 bólimdi telehıkaıa Bókeı ordasynda 1823-1845 jyldary bılik qurǵan Jáńgir hannyń tulǵasy, handyqtyń ishki ómiri men sol kezeńniń keıbir tarıhı sátteri týraly bolmaq.
Buǵan deıin aıtylǵandaı, «Qazaqstan» teleradıokorporasııasy bıyl kópshilik nazaryna Jáńgir han tulǵasyna arnalǵan «Saraı syry» serıalymen birge, Ahmet Baıtursynuly, Domalaq ana, Qanysh Sátbaev, Jumabek Táshenov jáne Muqaǵalı Maqataev týraly tarıhı telehıkaıalardy usynady.