Bıyl elimizde aýyl ákimderiniń saılaýy ótedi. Osy oraıda, QR Prezıdenti janyndaǵy Memlekettik basqarý akademııasynyń rektory Erlan Ábil saılaýdyń ádil ótetinine senim bildirip, saılaýda jeńiske jetkender qaıta daıarlaý kýrsynan ótetinin, qatysýshylar qandaı baǵyt boıynsha oqytylatyny týraly aıtyp berdi, dep habarlaıdy Egemen.kz.
Bul zań jobasy Memleket basshysynyń 2020 jylǵy 1 qyrkúıektegi Qazaqstan halqyna joldaýyn, sondaı-aq QR Prezıdentiniń 2021 jylǵy 15 qańtardaǵy VII shaqyrylymdaǵy Parlamenttiń birinshi sessııasynda aıtylǵan aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin tikeleı saılaýdy endirý týraly tapsyrmasyn oryndaý maqsatynda júzege asqan edi.
QR Prezıdenti janyndaǵy Memlekettik basqarý akademııasynyń rektory Erlan Ábildiń aıtýynsha, jaqyn arada «Saılaý týraly» QR zańyna sáıkes saılaý okrýgteriniń tizimi, olardyń shekaralary, aýmaqtyq saılaý komıssııalarynyń ornalasqan jerleri men onyń quramy buqaralyq aqparat quraldarynda jarııalanatyn bolady.
«Saılaýdy joǵary deńgeıde ótkizý úshin jergilikti memelkettik organdar, saıası partııalar, memlekettik emes uıymdar belsendi túrde úgit-nasıhat jumystaryn sapaly túrde ótkizý kerek», dedi Erlan Ábil.
Sonymen qatar ol jergilikti turǵyndar men bılik arasyndaǵy baılanys nyǵaıatynyna senim bildirdi. О́ıtkeni, aýyl basshylaryn jurtshylyq máslıhattyń qatysýynsyz ózderi saılap alady.
«Saılanǵan ákim halyqtyń asa mańyzdy máselelerin sheshýge tyrysady, al ony saılaǵan halyq barynsha qoldaý kórsetip, kómektesedi. Bul «Halyq únine qulaq asatyn memleket» atty qaǵıdanyń oryndalýynyń bir kórinisi dep bilemin», dedi ol.
Budan bólek, sarapshy saılanǵan ákimder memlekettik qyzmetshi bolyp sanalǵandyqtan, olardyń biliktiligin arttyrý men qaıta daıarlaý QR Prezıdenti janyndaǵy Memlekettik basqarý akademııasynyń quzyrettiliginde ekenin atap ótti. Osy oraıda, qazirgi tańda Ulttyq ekonomıka mınıstrligimen jáne basqa quzyrly memlekettik organdarmen birlesip arnaıy kýrs baǵdarlamasynyń jobasy daıyndalyp jatqanyn jetkizdi.
«Talqylaýdan keıin ol bekitilgen jaǵdaıda saılanǵan ákimder qaıta daıarlaý kýrsynda oqıtyn bolady. Oqý baǵdarlamasy eki bólikten turady, birinshisinde jeke bas quzyrettilikterin damytý bolsa, ekinshisinde kásibı quzyrettilikterdi arttyrýǵa baǵyttalǵan», dedi rektor.
Sondaı-aq sarapshynyń aıtýynsha, jeke bas quzyrettilikterin damytý úshin kommýnıkasııa daǵdylaryn damytý, kópshilik aldynda sóıleý, kóshbasshylyq sııaqty daǵdylar oqytylady. Al, kásibı quzyrettilikterdi arttyrý boıynsha memlekettik satyp alýdy uıymdastyrý, jer, salyq jáne bıýdjet kodeks sheńberinde jumys jasaý, jobalyq basqarý, táýekelderdi jáne ózgeristerdi basqarý sııaqty eń mańyzdy quzyrettilikterdi ıgerýge baǵyttalǵan oqytý júrgiziledi.
Ol aýyl ákimderin saılaýdyń ádil ótýi birinshiden saılaý úrdisin zań sheńberinde ári sapaly uıymdastyrý bolsa, ekinshisi, saıası partııalar men jergilikti halyqtyń belsendiligine baılanysty bolatynyn basa aıtty. Sonymen qatar saılaý naýqanynda buqaralyq aqparat quraldarynyń róli aıtarlyqtaı joǵary ekenin de tilge tıek etti.